Ákvæði 4. mgr. 202. gr. almennra hegningarlaga. Svar löggjafans við fjölgun kynferðisbrota gegn börnum samhliða aukinni notkun á upplýsinga- og fjarskiptatækni

Umfjöllunarefni þessarar ritgerðar er 4. mgr. 202. gr. almennra hegningarlaga. Ákvæðið hljóðar svo: "Hver sem með samskiptum á netinu, annarri upplýsinga- eða fjarskiptatækni eða með öðrum hætti mælir sér mót við barn yngra en 15 ára í því skyni að hafa við barnið samræði eða önnur kynferðismök eða til að áreita það kynferðislega á annan hátt skal sæta fangelsi allt að 2 árum." Fjallað verður um aðferðir barnaníðinga við að tæla börn og tildrög þess að ákvæðið var fest í lög og verður leitast við að kanna hvert inntak þess er. Skoðuð verða hlutlæg og huglæg refsiskilyrði ákvæðisins. Sérstök áhersla verður lögð á að kanna hvenær einstaklingur telst hafa mælt sér mót við barn í skilningi þess. Í því samhengi verður meðal annars horft til þess hverjir geta talist gerendur og þolendur í skilningi ákvæðisins, hver eigi frumkvæðið að fundinum eða kynferðislegum athöfnum og hversu nákvæm staðsetning og tímasetning þurfi að vera. Að lokum verður sjónum beint að því við hvaða tímamark í atburðarásinni beri að miða svo brot gegn ákvæðinu teljist fullframið. Ákvæðið er nýlegt í íslenskum rétti og því lítil reynsla komin á það. Verður því litið til norsks réttar og hliðstætt ákvæði í norskum hegningarlögum skoðað og borið saman við það íslenska, ásamt því að litið verður til norskrar dómaframkvæmdar