Meðferðir við tvíþátta geðsjúkdóm

Tvíþátta geðsjúkdómur er mjög alvarlegur og flókinn sjúkdómur þar sem einstaklingur þjáist bæði af alvarlegum geðsjúkdómi og vímuefnafíkn. Rannsóknarniðurstöður frá ýmsum löndum sýna að áfengis- og vímuefnaneysla er algeng eða um það bil 50% hjá einstaklingum með alvarlegar andlegar raskanir eins og geðklofa, geðhvarfasýki eða langvarandi þunglyndi. Það er nauðsynlegt fyrir þennan sjúklingahóp að fá viðeigandi sérhæfða meðferð til þess að ná sem bestum árangri og samhæfð úrræði fyrir bæði vandamálin. Í samantektinni voru skoðaðar mismunandi meðferðir sem notaðar eru til þess að meðhöndla tvíþátta geðsjúkdóma. Leitað var í Gagnagrunnunum PubMed, Google Scholar, ScienceDirect, Scopus, Cinahl og Medline. Við ýtarlega skoðun á niðurstöðum rannsókna og öðrum fræðilegum greinum um mismunnandi meðferðir sem notaðar eru við meðhöndlun á tvíþátta geðsjúkdómi kom í ljós að besta leiðin til að ná sem mestum árangri er samsetning á meðferðum sem meðhöndla bæði geðsjúkdóminn og fíkniefnaneysluna samtímis. Þess vegna er samþætt meðferð árangursríkasta meðferðin fyrir þessa sjúklingahópa hún uppfyllir meðferðarþarfir og meðhöndlar báða sjúkdómana í sjúklingum sem greindir eru tvíþátta Lykilorð: tvíþátta geðsjúkdómur, vímuefnafíkn, geðröskun, sálfélagslegar meðferðir, hópmeðferð, heildræn meðferð, hvatningarviðtal, hugræn atferlismeðferð, hópmeðferð, 12-spora prógramm, samþætt meðferð