Tvíkostalíkön; fræði og framkvæmd: Líkindareikningur og tölfræði í fótbolta.

Löngum hefur fólk sóst eftir því að ná að spá réttilega fyrir um það sem koma skal. Það að geta með góðri nákvæmni sagt fyrir um atburði framtíðar getur reynst dýrmætt og getur skilað sér í formi betri undirbúnings eða í formi fjárhagslegs gróða í gegnum veðmál. Í ritgerðinni eru búin til þrenns konar líkön; línulegt líkindalíkan, logit líkan og probit líkan, til þess að spá fyrir um líkindin á því hvort lið í ensku úrvalsdeildinni í knattspyrnu lendi í efstu sex sætum deildarinnar og tryggi sér þar með þátttökurétt í Evrópukeppni á komandi tímabili. Meðal áhrifaþátta sem til skoðunar eru í rannsókninni er virkni á félagaskiptamarkaði, markaðsvirði leikmanna, heimavellir liðanna og fyrri árangur. Áhrif fyrri árangurs og meðalvirðis leikmanna eru töluverð, sem samræmist fyrri rannsóknum um svipuð málefni, en niðurstöður benda ekki til áhrifa annarra skýriþátta. Í ritgerðinni er einnig snert á mikilvægi þess fyrir knattspyrnulið að komast í Evrópukeppni, þá annað hvort Meistaradeild Evrópu eða Evrópudeildina. Þátttaka í þessum keppnum hefur bæði í för með sér möguleika á góðum tekjum sem og öfluga auglýsingu þar sem keppnirnar ná til fjölda fólks um allan heim. Þá verður farið yfir hagfræði og tölfræði í íþróttum almennt og sér í lagi fótbolta. Vinsældir fótboltans hafa gert það að verkum að fjöldi bóka og rannsókna hafa verið ritaðar um ýmsar hliðar hans og þar er hagfræðilega hliðin engin undantekning. Fyrri rannsóknir á sviðinu verða þá sérstakt umræðuefni í þessu samhengi. Tölfræði hefur um nokkurt skeið verið hluti af íþróttum, einkum fótbolta, og er alls ekki ólíklegt að hún muni skipa sér þar enn stærri sess á næstu misserum