Nú falla öll vötn til Völsunga - Greinargerð með kennsluleiðbeiningum fyrir Völsunga sögu

Kennsluleiðbeiningar með Völsunga sögu er lokaverkefni okkar til B.Ed.-prófs í grunnskólakennarafræðum frá Menntavísindasviði Háskóla Íslands. Verkefnið er í tveimur hlutum, annars vegar kennsluleiðbeiningar og stuðningsefni og hins vegar greinargerð. Kennsluleiðbeiningarnar eru tvíþættar, þeim er ætlað að greiða aðgengi kennara og nemenda að Völsunga sögu. Fyrri hluti þeirra er sérstaklega hugsaður sem stuðningsefni til að auðvelda nemendum lestur og vinnu með söguna. Í honum eru stuttir útdrættir, tengslakort, orðskýringar og listi yfir sögupersónur. Seinni hluti kennsluleiðbeininganna er hugmyndabanki með kennsluhugmyndum, verkefnum og stuðningsefni fyrir kennara. Greinargerðin skiptist í umfjöllun um Völsunga sögu annars vegar og hins vegar umfjöllun um kennsluleiðbeiningarnar. Fyrst eru raktar helstu ástæður þess að ráðist var í gerð kennsluleiðbeininga með sögunni. Fjallað er um uppbyggingu og markmið leiðbeininganna sem og það vinnuferli sem fram fór við gerð þeirra. Einnig er greint frá áherslum sem settar voru í forgrunn ásamt þeim fræðum sem höfð voru til hliðsjónar og settu mark sitt á verkið. Í kjölfarið er fræðileg umfjöllun um Völsunga sögu, uppruna, einkenni og umfjöllunarefni hennar. Að lokum er fjallað um þá kosti sem hún gefur í kennslu