Stöndum saman: Beinar áhorfsmælingar á árangri eineltisforvarna í stuðningi við jákvæða hegðun

Einelti í grunnskólum er viðvarandi vandamál sem hefur í för með sér víðtækar afleiðingar bæði á líf þolanda jafnt sem geranda. Rannsóknin sem kynnt er hér athugaði áhrif af forvörnum gegn einelti sem er hluti af heildstæðum stuðningi við jákvæða hegðun (School-wide positive behavior support, SW-PBS). SW-PBS er þriggja laga forvarnakerfi sem er ætlað að skapa jákvætt skólaumhverfi fyrir börn með því að samhæfa styrkingu æskilegrar og óæskilegrar hegðunar. „Stöndum saman“-eineltisforvarnir eru einn þáttur innan SW-PBS-kerfisins sem dregur úr einelti með því að breyta aðdraganda og afleiðingum ofbeldis. Einelti er gjarnan viðhaldið af athygli jafnaldra og eru því „Stöndum saman“-forvarnirnar hannaðar til þess að kenna börnum æskileg viðbrögð við ofbeldi og einnig að samhæfa viðbrögð starfsmanna. Rannsóknin fór fram vorið 2012 og var endurtekning af bandarískri rannsókn sem mat árangur af „Stöndum saman“. Notuð var margfalt grunnskeiðssnið á sex þátttakendum í þremur grunnskólum Reykjavíkur. Hér er sagt eingöngu frá niðurstöðum úr einum af þessum þremur grunnskólum. Beinar áhorfsmælingar voru stundaðar á almennum svæðum skólans yfir eina skólaönn á hegðun tveggja þáttakenda, sérvöldum vegna hárra tíðni ofbeldis í garð skólafélaga sinna. Notuð var AB-tilraunasnið (sem var hluti af margföldu grunnskeiðssniði) til að meta áhrif inngrips á hegðun þátttakenda í þessum skóla. Niðurstöður sýndu fækkun ofbeldistilfella þátttakenda á milli skeiða en misvísandi niðurstöður voru um hegðun þolenda og áhorfenda. Þær niðurstöður eru að lokum skoðaðar í ljósi fyrri rannsóknar á sama sviði og hugsanlegir annmarkar eru ræddir