Te taiao: te titiro a te Māori

Ko te kaupapa o tēnei tuhinga ko te titiro a te Māori ki te taiao. He mea tuhi i runga i te aroha, i te whakapono ki ngēnei mea, ki te ātaahua o te taiao me ngā kōrero mōna. E whakatangatatia ana ngā āhuatanga o te taiao, ngā rākau, ngā manu, ngā ika, te kohu, ngā kapua, ngā maunga, otirā ngā mea katoa. Ara noa atu ngā kōrero, he whakapapa ō rātou, he huānga tētehi mea ki tētehi, he mauri tō tēnā mea tō tēnā mea. E ora ana ngā mea katoa o te ao, ka whai tamariki, he mātua he tūpuna anō, te katoa tae atu hoki ki te tangata, he wāhanga ia nō te taiao. Hei aha tēnei tuhinga? Ko tāna mahi he whakaatu i ngēnei āhuatanga. Ā he whakamātau hoki ki te whakautu i te pātai he aha i whērā ai te titiro a ngā tūpuna ki tō rātou taiao. He kohikohingā tēnei nō ngā kōrero maha e takoto mai naka i roto i ngā pukapuka kua tāia kētia. Ehake i te mea ka kōrerotia ngā mea katoa, otiia ka tirohia noatia ngētehi āhuatanga o tēnei hanga te taiao. Kāhore i tuhia i runga i ngā kōrero ā waha a ngētehi kaikōrero, whēnā i ngētehi atu tuhinga roa. He mahi nui tērā mā tētehi atu hei whai, heoi anō tēnei he huihuinga nō ngētehi kōrero kua tuhia i mua atu. Ka whakarārangitia ngā kōrero neki i muri ake nei. Ko tōna timatanga kei te Ōrokohanga, ko te timatanga tērā o te taiao. Ko te whenua ka whai mai me ngā kōrero mōna. Muri iho ko te wai me ngōna āhuatanga katoa. Ko te rangi, ngā mea katoa o te rangi ka whai mai i muri i tēnā. Muri iho anō ko ngā manu, ko ngā ngārara me ngā ngāngara, ngā rākau me ngā ika. Ka mutu atu i ngā tupua, i ngā taniwha me ngā patupaiarehe, i ngā kōrero mō ngērā. E iwa wāhanga nui te katoa o tēnei tuhinga. Kei te timatanga tētehi wāhanga hei whakamārama i te tuhinga ā kei te mutunga tētehi atu wāhanga hei whakatōpū, hei whakarāpopoto i ngā kōrero o roto i te puku o te tuhinga nei. Kei ngā wāhanga o te pukapuka nei he kōrero mō tēnā mea, mō tēnā mea i raro i tōna ūpoko anō, me ngā whakaāhua e rite ana mōna. Ko te tūmanako ka kite te kaipānui i te pūrotutanga o te taiao o te Māori