Imscrúdú ar na dea-chleachtais agus dearcthaí atá ag múinteoirí agus páistí i leith na Gaeilge i scoileanna lán-Bhéarla

Tugtar le fios i gcáipéisí agus taighde náisiúnta go mbíonn deacrachtaí ann maidir le múineadh agus foghlaim na Gaeilge i scoileanna lán-Bhéarla agus go mbíonn saineolaithe buartha faoi dhul chun cinn na Gaeilge sna scoileanna sin (An Roinn Oideachais 2020; Hislop 2018; An Roinn Oideachais agus Eolaíochta 2007). Ó thaithí an taighdeora, bíonn dearcthaí difriúla ag páistí agus múinteoirí araon i leith na Gaeilge. Bíonn dea-chleachtais éifeachtacha in úsáid ag múinteoirí freisin agus is fiú iad a thaifead. Is í aidhm an taighde seo ná na dearcthaí atá ag múinteoirí agus páistí i scoileanna lán- Bhéarla a iniúchadh. Teastaíonn ón taighdeoir na dea-chleachtais a bhíonn in úsáid ag múinteoirí a thaifead chomh maith leis na riachtanais atá i scoileanna lán-Bhéarla leis an nGaeilge a mhúineadh go héifeachtach. Teastaíonn ón taighdeoir léargas a fháil ar na riachtanais atá sna scoileanna T2 sin leis an nGaeilge a chur chun cinn. Déantar mórcheist agus ceisteanna leabaithe an taighde a iniúchadh faoin bparadaím thógachaíoch. Bailítear sonraí an taighde trí úsáid a bhaint as modhanna measctha. Úsáidtear ceistneoirí ar líne, agallaimh leath-structúrtha agus grúpaí fócais leis na sonraí a bhailiú. Tugtar le fios sa taighde seo go bhfuil bearnaí sa taighde náisiúnta maidir le múineadh na Gaeilge. Léirítear le fios ann freisin go bhfuil páistí agus múinteoirí ann atá dearfach i leith na Gaeilge. Taispeántar go bhfuil múnteoirí agus páistí ann atá ag iarraidh feabhas a chur ar a gcuid Gaeilge ach nach bhfuil na tacaíochtaí oiriúnacha ar fáil dóibh. Táthar ag súil go mbeidh an taighde seo cabhrach dóibh siúd a bhíonn ag cur le múineadh na Gaeilge i scoileanna lán-Bhéarla. Táthar ag súil freisin go mbeidh na dea-chleachtais a luaitear sa taighde cabhrach do mhúinteoirí na Gaeilge i scoileanna lán-Bhéarla.N