Céard é tionchar an teagaisc fhoirm-dhírithe ar fheasacht teanga múinteoirí? taighde píolótach i ngaelcholáiste cathrach

Tugtar le fios an riachtanas go mbeadh múinteoirí tumoideachais cumasach, inniúil agus feasach sa sprioctheanga, eolasach faoin bpróiseas sealbhaithe teanga agus go mbeadh oiliúint fhóirsteanach agus taithí fheiliúnach acu ar oideolaíocht agus ar mhodheolaíochtaí na hearnála (May et al. 2004; Baker agus Wright 2017; Ó Ceallaigh et al. 2019a; Ó Ceallaigh agus Ní Shéaghdha 2021; Ó Laoire et al. 2021) ach faraor, feictear easnaimh mhóra in earnáil thumoideachas na hÉireann. Maítear sa taighde go bhfuil múinteoirí ag feidhmiú sa ghort gan oiliúint, gan na tacaíochtaí cuí agus iad ag streachailt le neamhdhiongbháilteacht teangeolaíoch (Leavy et al. 2018; Ó Ceallaigh et al. 2019a) agus nach bhfuil na scileanna córasacha acu dul i ngleic le castachtaí an oideachais dhátheangaigh (Tedick et al. 2011). Ar an mbonn sin, tá sé i gceist ag an taighde seo iniúchadh a dhéanamh ar réiteach na faidhbe thuas. Tugadh forbairt ghairmiúil ar an teagasc foirm-dhírithe (TFD) do ghrúpa múinteoirí, iarradh orthu an TFD a chur i bhfeidhm ina ranganna, rinneadh measúnú ar thionchar na hidirghabhála agus cláraíodh a n-eispéireas. Tugadh faoin taighde seo faoi scáth na paraidíme pragmataí ag baint úsáid as modhanna measctha idir thaighde cáilíochtúil agus thaighde cainníochtúil. Ar an iomlán bhí na múinteoirí an-dearfach faoin TFD. Chonacthas buntáistí agus féidearthachtaí go bhféadfadh a bheith leis dá mbeadh sé curtha ar siúl ar bhonn scoile uile cé nach raibh tionchar suntasach na hidirghabhála le feiceáil i dtorthaí na dtrialacha. Soiléiríodh an easpa tacaíochta agus an easpa aitheantais a bhíonn ann do mhúinteoirí na hearnála. Táthar ag súil go bhféadadh leis an taighde seo treoir a chur ar fáil do scoileanna do chur i ngníomh an TFD mar chuid den fhéinmheastóireacht scoile le go bhféadfaí an ruaig a chur ar neamhdhiongbháilteacht teangeolaíoch agus forbairt a dhéanamh ar fheasacht teanga múinteoirí agus scoláirí araon.N