Leikur sem námsaðferð fyrir fjöltyngd börn í leikskóla : málskilningsteningurinn

Þetta verkefni er 10 eininga lokaverkefni til B.Ed.-gráðu í leikskólakennarafræði við Háskóla Íslands. Markmið verkefnisins er að útbúa leik með tening sem kennsluaðferð í málskilningi og grunnorðaforða fyrir starfsfólk leikskóla og grunn fyrir íslenskukennslu fjöltyngdra barna í leikskólum. Fólksflutningar eru að aukast um allan heim, hvort sem það er vegna vinnu, náms eða leitar að betra lífi. Sífellt fleiri einstaklingar ákveða að yfirgefa lönd sín og flytja til nýs lands. Sumir eru að flýja stríðsátök og eru á flótta. Á Íslandi eins og í öðrum löndum hefja innflytjendur nýtt líf og stofna fjölskyldur sem þannig verða tví- eða fjöltyngdar. Sumir eiga börn sem hafa flutt til landsins mjög ung og aðrir hafa fætt börn hér. Í sumum tilfellum er íslenska ekki töluð á heimilum þeirra. Leikskólanám er ekki skylda hér á landi en fyrir fjöltyngd börn getur leikskólinn verið fyrsta skrefið til að læra um íslenskt samfélag og ná tökum á tungumálinu. Þess vegna er svo mikilvægt að leikskólar séu tilbúnir til að taka á móti þessum börnum og veita þeim nauðsynlega aðstoð með máltökuna. Starfsfólk á leikskólum, bæði leikskólakennarar og leiðbeinendur bera ábyrgð á að finna leiðir í kennslu og námi fyrir fjöltyngd börn. Það má segja að leikur bjóði upp á marga möguleika til kennslu og hann getur einnig verið besta leiðin til að hjálpa börnum með máltöku. Unnið var með ýmsar heimildir í þessu verkefni, m.a. grunnþætti menntunar í Aðalnámskrá og kenningar um námsaðferðir samkvæmt Vygotsky, Piaget og Dewey