Hvað einkennir stjórnsýslulega stöðu fatlaðs fólks í rafrænum heimi á Íslandi?

Hér í þessari rannsókn verður sjónum beint að rafrænni stjórnsýslu og hvað einkennir stöðu fatlaðs fólks í hinum rafræna heimi á Íslandi, með hliðsjón af innleiðingu samnings Sameinuðu þjóðanna um réttindi fatlaðs fólks. Um er að ræða eigindlega rannsókn en gagnaöflun hennar var tvíþætt. Annars vegar fór gagnaöflun fram með viðtölum við fatlað fólk og aðstandendur um upplifun þeirra og reynslu af rafrænni stjórnsýslu. Hins vegar var gögnum safnað með fræðilegum heimildum og gögnum úr íslenskri stjórnsýslu. Rakin var saga og einkenni núverandi stöðu fatlaðs fólks innan opinberrar stjórnsýslu á Íslandi er varðar innleiðingu samnings Sameinuðu þjóðanna um réttindi fatlaðs fólks. Auk þess var sjónum beint að því hvar stjórnvöld standa í innleiðingu samningsins og lögfestingu hans. Gögn rannsóknarinnar voru skoðuð úr frá innleiðingarkenningum stjórnsýslufræðanna. Helstu niðurstöður rannsóknarinnar eru að stjórnvöld hafa hingað til ekki alltaf tryggt fötluðu fólki aðgengi að rafrænni stjórnsýslu með viðeigandi ráðstöfunum sem endurspeglast í frásögnum viðmælenda. Það má draga þá fræðilegu ályktun varðandi stjórnsýslulega stöðu fatlaðs fólks að með landsáætlun um innleiðingu samnings Sameinuðu þjóðanna um réttindi fatlaðs fólks verði stefnuákvæðum stjórnvalda um jafnt aðgengi allra náð. Innleiðing áætluninnar ætti að takast ef horft er til stjórnsýslufræðanna og kenninga um árangursríka innleiðingu