Greining á stöðu leikskólabarna með tal- og málþroskaröskun á Íslandi

Samkvæmt lögum í landinu eiga börn að hafa óhindraðan aðgang að þeirri þjónustu sem þau kunna þarfnast um leið og þau þarfnast hennar. Málþroski barna er mikilvægur lífsgæðum og framtíð barna á marga vegu, þar á meðal er hann undirstaða náms, í félagslífinu og til þess að barnið geti tjáð sig um þarfir, óskir og tilfinningar sínar svo eitthvað sé nefnt. Börn þróa með sér mestan málþroska á leikskólaárunum og því er mikilvægt að beita snemmtækri íhlutun og bregðast við sem allra fyrst þegar grunur um málþroskafrávik vaknar. Í þessu verkefni er fjallað um stöðu leikskólabarna með tal- og málþroskaröskun á Íslandi. Skoðað er hvernig staðan hefur þróast á síðustu árum, hvernig hún hefur breyst og hvort hún hafi breyst yfir höfuð. Markmið ritgerðarinnar er að varpa ljósi á stöðu barna með tal- og málþroskaröskun í samfélaginu í dag. Einnig verður sjónum beint að því hvernig staða barnanna kemur heim og saman við lög og reglugerðir í landinu. Biðin eftir meðferð við tal- og málþroskaröskun getur verið allt að 5 ár. Til þess að barn fái kostnað við þjónustu talmeinafræðings niðurgreiddan þarf það að vera komið með greiningu, en hana getur tekið allt að 24 mánuði að fá. Biðin eftir þjónustunni sjálfri getur síðan farið í allt að 36 mánuði. Mikilvægt er að greina stöðu barnanna og hvort þjónustuúrræði séu að mæta þörfum þeirra sem og réttindum, samkvæmt lögum sem kveða á um