O'ZBEKISTON RESPUBLIKASIDA KORPORATIV BOSHQARUVNING VUJUDGA KELISHI VA SHAKILLANISH BOSQICHLARI

Mamlakatimizda amalga oshirilayotgan iqtisodiy islohotlardan ko‘zlanayotgan asosiy maqsad mulkiy xilma-xillik asosida iqtisodiy faoliyatni yanada jadallashtirish, mulklarni davlat tasarrufidan chiqarib, nodavlat sektorga o‘tkazish va shu orqali turli o‘z-o‘zini boshqaruvchi xususiy iqtisodiy xo‘jalik birliklarini vujudga keltirish ekanligi bugungi kunda hech kimga sir emas. Mamlakatimizda amalga oshirilayotgan bunday iqtisodiy islohotlarning muvaffaqiyati ko‘p jihatdan davlat tasarrufidan chiqarilgan mulklarni samarali tarzda qayta harakatga keltirish, qo‘shma korxonalar tuzish, korxonalarni ochiq turdagi aksiyadorlik jamiyatlariga aylantirish, ayniqsa, kichik hamda xususiy tadbirkorlikni rivojlantirishga bog‘liqdir. Ta’kidlash joizki, korporativ boshqaruv tuzilmalarining samarali faoliyat yuritishi, ular aksiyadorlarining manfaatlari to‘laqonli bo‘lishi, investitsion jozibadorligi, moliyaviy inqirozga uchramasligi ko‘p jihatdan korxonada amal qilayotgan korporativ boshqaruv tizimiga bog‘liq. Shunday ekan, iqtisodiyotni modernizatsiyalash sharoitida korxonalarda korporativ boshqaruv tizimini tashkil etish hamda ushbu tizimni takomillashtirish yo‘llarini o‘rganish muhim vazifalardan biri sanaladi. Yurtboshimiz ta’biri bilan aytganda, “Bu yil yuqori o‘sish sur’atlari bilan rivojlanish, barcha mavjud imkoniyatlarni safarbar etish, o‘zini oqlagan islohotlar strategiyasini izchil davom ettirish yili bo‘ladi”5 . Shunday ekan, Korporativ boshqaruv tizimini tegishli tartibda o‘rganish bugungi kunning muhim strategik yo‘nalishlaridan biridir. Maqolada korporativ boshqaruvning yurtimizda shakillanish bosqichlari,bugungi kundagi holati va muammolar, ularni yechishga bo‘lgan takliflarni ko‘rib chiqamiz