Lengi býr að fyrstu gerð - Fjölskyldumeðferð og ættleiðingar

Ættleiðingar hafa verið hluti af samfélagi okkar í einhverskonar mynd alla tíð. Málaflokkurinn hefur tekið miklum breytingum í gegnum tíðina og undanfarin ár hefur verið lögð aukin áhersla á þjónustu við börnin og fjölskyldur þeirra í tengslum ættleiðingarferlið. Tilgangur þessarar rannsóknar var að efla þjónustu við fjölskyldur ættleiddra, fyrir, meðan og eftir ættleiðingu út frá sjónarhóli fjölskyldumeðferðar. Markmiðið var að skoða hvernig ég nýti atvik úr starfi og ólíka fagþekkingu á sviði ættleiðinga til að þróa heildstæða þjónustu við fjölskyldur samhliða ættleiðingu barns. Þessi rannsókn er starfendarannsókn þar sem ég skoðaði hvernig ég sem fagaðili þróaðist og mótaðist með aukinni þekkingu og reynslu og hvernig sú vegferð hafði áhrif á þjónustu sem veitt var hjá Íslenskri ættleiðingu. Rannsóknardagbók og minningar voru helstu gagnaöflunarleiðir þessarar rannsóknar ásamt vettvangsferð á barnaheimili í Tékklandi. Niðurstöður sýndu að með þeirri fagþróun sem ég fór í gegnum í námi og starfi, ásamt þeim breytingum sem hafa orðið á þjónustu Íslenskrar ættleiðingar, hefur orðið til umfangsmikil þjónusta hjá félaginu. Í gegnum eigin fagþróun áttaði ég mig á mikilvægi þess að skilja fortíð og áskoranir ættleiddra barna til að mæta og styðja við þau og fjölskyldur þeirra. Ég tileinkaði mér einnig færni til að veita fjölskyldumeðferð sem síðan varð stór hluti af þeirri þjónustu sem boðið er upp á í kringum ættleiðingarferlið hér á landi. Þessi áhersla samræmist þeirri þjónustuþörf sem rannsóknir hafa sýnt fram á að sé nauðsynleg fyrir fjölskyldur ættleiddra, fyrir ættleiðingu, á meðan á henni stendur og eftir ættleiðingu. Þrátt fyrir mikla þróun á fræðslu og þjónustu í kringum ættleiðingarferlið er áfram þörf á að auka skilning á fortíð og áskorunum ættleiddra barna með fræðslu og ráðgjöf og skoða hvernig hin ýmsu samfélagslegu kerfi geta haldið áfram að hlúa að velferð ættleiddra barna og fjölskyldum þeirra