Áhrif leiðandi uppeldis á samskiptahæfni unglinga

Unglingsárin eru viðburðaríkt tímabil í lífi einstaklinga þar sem margar breytingar eiga sér stað. Á þessum árum fara einstaklingar að krefjast meira sjálfræðis og sjálfstæðis frá foreldrum sem getur skapað árekstra og átök í samskiptum innan fjölskyldunnar og meðal vina. Víðtækt endurskipulag verður á samskiptum á unglingsárunum og skiptir þar máli að búa yfir góðri hæfni í samskiptum og að geta sett sig í spor annarra til þess að koma skoðunum sínum á framfæri, leysa ágreining og félagsleg átök í síbreytilegum heimi. Markmið þessarar ritgerðar er að skoða hvernig leiðandi uppeldi hefur áhrif á samskiptahæfni unglinga út frá fræðilegum heimildum. Uppeldisaðferðir foreldra geta haft áhrif á samskiptahæfni, áhættuhegðun og velferð fyrir komandi fullorðinsár. Rannsóknir hafa bent á að unglingar sem upplifa foreldra sína leiðandi búa yfir meiri samskiptahæfni samanborið við unglinga sem telja forelda sína afskiptalausa, eftirláta eða skipandi. Foreldrar sem styðjast við leiðandi uppeldi veita börnum tækifæri á að tjá skoðun sína og hlusta á þau á gagnrýninn hátt sem gefur samskiptum þeirra aukið vægi, styrkir samband og traust þeirra. Miklu máli skiptir að auka hæfni forelda til að takast á við þau tímamót sem unglingsárin eru með því að efla samskiptahæfni, sýna skilning, umhyggju og fleira sem einkennir leiðandi uppeldi til að styðja ungmennin á vegferð sinni í átt að fullorðinsárunum