Mikilvægi tómstunda fatlaðra barna

Ritgerð þessi er fræðileg heimildaritgerð og fjallar um mikilvægi tómstunda fatlaðra barna á aldrinum 9 til 16 ára en einnig mun ég skoða hvaða tómstundaframboð er fyrir þennan hóp á Akranesi. Ritgerðin er unnin sem 10 eininga lokaverkefni til BA-gráðu í tómstunda- og félagsmálafræði við Háskóla Íslands. Fjallað er um tómstundir og mikilvægi þeirra, einnig er fjallað um mikilvægi tómstunda fatlaðra barna og svarað verður rannsóknarspurningunni: Hvert er mikilvægi tómstunda fatlaðra barna á aldrinum 9–16 ára? Helstu niðurstöður sýna fram á að tómstundaþátttaka er mikilvæg öllum börnum og ungmennum en engu síður hjá fötluðum börnum og ungmennum, þar sem þau hafa meiri frítíma en ófötluð börn og ungmenni. Skoðað verður mikilvægi þess að börn kunni að nota tómstundamenntun sér til gagns, þar sem of mikill frítími fyrir einstaklinga eykur ekki endilega lífsgæði ef þau kunna ekki að nýta tíma sinn á jákvæðan og uppbyggilegan hátt. Ef tómstundir eru ekki nýttar á jákvæðan og uppbyggilegan hátt eykst ekki heilsa og vellíðan einstaklinga. Lykilhugtök: tómstundir, tómstundamenntun, fötluð börn, tómstundaþátttaka, tómstundaávinningur