Húsið á röngunni : rannsókn á verki Hreins Friðfinnssonar

Húsið sem stóð ranghverft í hrauninu, þessi endalausa uppspretta hugmynda og segulmagnaða form. Verkið sem lifir að eilífu í ljósmyndinni. Ef horft er dýpra, hvað leynist þá á bakvið? Í þessari ritgerð mun ég gera tilraun til þess að greina rými í gegnum ljósmynd. Listaverkið „House project“ eftir Hrein Friðfinnsson varð fyrir valinu í þessari greiningu og verður sjónum beint að fyrsta hluta þess; Hús 1, sem jafnframt er húsið sem ég vísa í hér að framan. Verkið er í formi heimildar um viðburð og skilgreint sem ljósmyndaverk, en ekki hlutlægur skúlptúr. Það sem er sérstakt við þetta hús er að það var byggt á röngunni, hið innra snéri að veröldinni og hið ytra vísaði inná við. Markmiðið er að skoða það frá nýju sjónarhorni, komast að kjarnanum. Leitað er til speki fyrirbærafræðinnar til að komast nær margvíslegri merkingu verksins, þar sem fyrirbærafræðin byggir á því að skoða hluti í sinni tæru birtingarmynd. Þar er ekki stuðst við fyrirframgefnar hugmyndir eða skoðanir. Með þeirri nálgun þenst verkið út og fjölmargar hugleiðingar og spurningar koma fram. Hreinn segir okkur hvað það er sem ljáir verkinu merkingu og hægt er að styðjast við í þessari rannsókn. Vangaveltur um heiminn og staðsetningu hans koma fram í skrifunum, þar sem alheimurinn leikur stórt hlutverk í verkinu. Jafnframt verða tengingar á milli Ólafs Elíassonar og Hreins í vinnuaðferðum og hugmyndavinnu kannaðar, þar sem áhersla verður lögð á samband ´inni´ og ´úti´ sem verk Hreins, Hús 1, byggist á