Ofbeldi og vanræksla barna: Áhrif fjölskyldugerðar, uppruna og fjárhags á heimili

Ill meðferð barna getur birst á marga vegu og á sér margar mögulegar orsakir og ýmsar neikvæðar afleiðingar. Algengar birtingamyndir eru vanræksla og ofbeldi og atriði innan heimilisins geta ýmist dregið úr eða aukið líkur á því að börn upplifi slíka meðferð. Markmið þessarar rannsóknar var að kanna hvort að fjárhagur, fjölskyldugerð og uppruni gætu haft áhrif á tilfinningalega vanrækslu barna og reynslu þeirra af ofbeldi. Skortur á stuðningi og tengslum var notað sem viðmið fyrir tilfinningalega vanrækslu og reynsla af kynferðisofbeldi var skoðuð sem viðmið af ofbeldi. Rannsóknin var megindleg og notast var við gögn úr spurningalistanum Heilsa og lífskjör skólabarna sem lagður er fyrir öll grunnskólabörn landsins á fjögurra ára fresti. Notast var við svör nemenda í 10. bekk frá árinu 2014 og 2022. Helstu niðurstöður sýna að verri fjárhagur fjölskyldunnar, stjúptengsl, það að eiga einstætt foreldri og að vera af erlendum uppruna eykur líkur á því að stúlkur hafi orðið kynferðislegu ofbeldi af einhverju tagi. Betri fjárhagur fjölskyldunnar minnkar líkur á því að drengir hafi orðið fyrir slíku ofbeldi en að búa á fósturheimili og að vera af erlendum uppruna eykur þær líkur. Einnig kom í ljós að hjá stúlkum hefur versnandi fjárhagsástand fjölskyldunnar, stjúptengsl og erlendur uppruni tengsl við auknar líkur á tilfinningalegri vanrækslu. Hjá drengjum hefur mjög slæm fjárhagsstaða, að búa með einstæðu foreldri eða á fósturheimili og að vera af erlendum uppruna þau áhrif að líkur á tilfinningalegri vanrækslu aukast