The potential for transformative adaptation : Collaborative spaces and collective value development in local climate adaptation

Behovet for klimaomstilling, -tilpassing og -handling for å kunne handtere konsekvensane av menneskeskapte klimaendringar og tap av biologisk mangfald har aldri vore større. Dette prosjektet utforskar korleis heilskaplege klimatilpassingstiltak og løysingar kan påverke klimaomstilling og samfunnsendring, samt handtere klimasårbarheit på lang sikt. I dag dreier klimatilpassing seg ofte om å finne tekniske og konkrete løysingar på kriser og risiko. Nokre løysingar vil krevje større endringar knytt til indre menneskelege dimensjonar som tankesett, tru, verdiar, normer, og verdssyn. Å ta omsyn til slike indre dimensjonar kan påverke endringsprosessar sterkt og er difor ein viktig del av klimaomstillings- og tilpassingsstrategiar. Med mål om å forstå potensialet for å fremje tilpassingsstrategiar som kan skape klimaomstilling og samfunnsendring, studerer eg samspel og samarbeid mellom aktørar på to klimatilpassingsarenaer, (1) samproduksjonsprosessar for klimakunnskap og (2) planleggingsprosessar for blå-grøn infrastruktur. Avhandlinga diskuterer korleis ein kan handtere interesser og verdiar, rolla til kollektive verdiar, samt potensialet heilskaplege klimatilpassingstilnærmingar kan skape. Eg analyserer både samproduksjonsmetodar i eit workshop-format og samhandling mellom aktørar i faktiske planleggingskontekstar. Dei to perspektiva viser kor viktig det er å skape både konkrete og mentale rom for samarbeid og forhandling mellom aktørar med ulike verdiar og interesser. Avhandlinga føreslår konkrete metodar for å skape slike rom, og legg vekt på kor viktig det er å beskrive indre dimensjonar på måtar som gir mening for menneska som arbeider i tekniske tilpassingskontekstar. Aktørane innan klimatilpassing i arealplanlegging representerer ofte verdiar knytt til yrkesfaglege ansvar, mandat og mål. Samtidig kan dei og utvikle kollektive verdisett på tvers av sektorinteresser. Denne avhandlinga sitt hovudbidrag til klimaomstilling- og klimatilpassingslitteraturen er korleis den empirisk viser potensialet for kollektiv verdiutvikling, samt mogelegheitene i fysisk urban infrastruktur som kan gi rom for å implementere nye måtar å tenke og arbeide med lokal tilpassing på