Kostnaður hins opinbera vegna niðurfellingar námslána hjá hjúkrunarfræðingum og kennurum. Kostnaðargreining

Nýliðun hjúkrunarfræðinga og kennara á lægstu stigum skólakerfisins hefur farið versnandi undanfarin ár og ritaðar hafa verið margar skýrslur um hvernig megi laða fólk að háskólanámi í þessum greinum og svo seinna meir að vinnu. Skortur á hjúkrunarfræðingum hefur verið viðvarandi í áratugi og það þarf að fylla í nokkur hundruð stöðugildi til að heilbrigðiskerfið sé fullmannað. Það sama má segja um leikskóla og grunnskólakennara, en á leikskólum landsins eiga 2/3 starfsmanna að vera með starfsréttindi leikskólakennara en einungis 1/3 starfsmanna í dag eru með slík réttindi. Yfirvofandi skortur á grunnskólakennurum mun koma illa niður á menntun yngri barna og eftir breytingar á kennaranámi þar sem það var lengt úr 3 árum í 5 ár þá hefur útskrifuðum kennurum fækkað snarlega. Með sama áframhaldi munu nýútskrifaðir kennarar ekki ná að viðhalda nýliðun í kennarastéttinni. Í þessari kostnaðargreiningu er varpað ljósi á þann kostnað sem myndi falla á ríkið við að greiða niður námslán einstaklinga sem útskrifast af þessum námsleiðum í háskóla. Gerð var kostnaðargreining frá sjónarhorni hins opinbera. Niðurgreiðslu má útfæra á fjölmarga vegu en í þessari ritgerð eru fjórar aðferðir skoðaðar. Þær eru mismunandi varðandi það hvenær niðurfelling er gerð og þau skilyrði sem þarf að uppfylla til að fá felld niður námslán. Einnig var kostnaðurinn við að hækka laun sem um næmi greiðslu námslána skoðaður. Sú aðgerð tæki til allra starfsmanna sem vinna innan heilbrigðiskerfisins og menntakerfisins