Reynsla hjúkrunardeildarstjóra sem stjórnendur og leiðtogar í heimsfaraldri: Styðjandi og hindrandi þættir

Tilgangur: COVID-19 heimfaraldurinn hefur haft umfangsmikil áhrif á líf og störf margra, ekki síst þeirra sem starfa og leiða heilbrigðisþjónustu svo sem hjúkrunardeildarstjóra. Tilgangur þessarar rannsóknar er að varpa ljósi á hvað studdi og hvað hindraði störf hjúkrunardeildarstjóra á legudeildum á Íslandi fyrsta árið sem COVID-19 heimsfaraldurinn geisaði. Aðferð: Notast var við eigindlega aðferðafræði. Þátttakendur voru 13 hjúkrunardeildarstjórar á legudeildum á Íslandi valdir með tilgangsúrtaki og snjóboltaaðferð, þátttakendur voru allt konur. Tekin voru hálfstöðluð einstaklingviðtöl og þau greind með þemagreiningu. Niðurstöður: Greind voru þrjú meginþemu; 1) áskoranir, 2) samstaða og stuðningur og 3) upplýsingar. Hvert þema felur í sér áhrifaþætti tveggja andstæðra póla sem ýmist geta talist vera hvati eða hindrun í starfi þátttakenda. Þátttakendur upplifðu tímabil heimsfaraldurs sem tíma mikils álags og þreytu, hinsvegar töldu þær sig vera vel undirbúnar vegna menntunar sinnar og reynslu og höfðu flestar þeirra jákvæða upplifun af reynslu sinni. Samstaða innan vinnustaðarins var oftast mikil þar sem að starfsfólk deilda og aðrir deildarstjórar innan sömu stofnunar voru þátttakendum góður stuðningur. Hinsvegar kom einnig fram skortur á stuðningi frá yfirmönnum. Upplýsingar voru mikilvægar fyrir störf þátttakenda og fannst þeim upplýsingafundir almannavarna sem haldnir voru reglulega meðan á faraldrinum stóð sérlega gagnlegir. Sumir þátttakendanna upplifðu að þær hafi fengið of mikið af upplýsingum á meðan öðrum fannst þær skorta upplýsingar. Ályktanir: Niðurstöður rannsóknarinnar benda til þess að COVID-19 heimsfaraldurinn hafi verið krefjandi verkefni fyrir hjúkrunardeildarstjóra sem var einnig gefandi að takast á við þegar nægur stuðningur var til staðar. Sú menntun og reynsla sem hjúkrunardeildarstjórar hafa styður þá í starfi og þeir réðu vel við þær áskoranir sem fylgdu heimsfaraldrinum. Að sama skapi þarfnast þeir stuðnings frá sínum næstu yfirmönnum og að tryggt sé að nauðsynlegar upplýsingar séu til staðar þegar á þarf að halda