Skóli án aðgreiningar í Fjarðabyggð : hlutverk og framlag þroskaþjálfa

Í þessari rannsókn verður sjónum beint að sveitarfélaginu Fjarðabyggð og stefnunni um skóla án aðgreiningar. Markmiðin með ritgerðinni eru þríþætt. Í fyrsta lagi að varpa ljósi á þann skilning sem fagfólk Fjarðabyggðar leggur í stefnuna um skóla án aðgreiningar. Í öðru lagi skoða þær leiðir sem lagðar eru eða þyrfti að leggja til grundvallar framkvæmd stefnunnar í takt við hugmyndafræði hennar. Að lokum er leitast eftir að draga fram sýn ofangreindra aðila á mikilvægi sérþekkingar þroskaþjálfa við framkvæmd og innleiðingu á stefnunni um skóla án aðgreiningar í grunnskólum. Unnið var samkvæmt eigindlegri rannsóknarhefð þar sem viðtöl voru tekin við ólíka fagaðila sveitarfélagsins Fjarðabyggðar. Niðurstöður leiða í ljós að fagfólk Fjarðabyggðar hefur sameiginlega skilning á þeirri hugmyndafræði sem stefnan um skóla án aðgreiningar byggir á. Einnig að sveitarfélagið Fjarðabyggð teflir fram teymi Spretts sem svari við ákalli skólanna um samþætta skólaþjónustu. Þá kemur fram að hlutverk þroskaþjálfa í grunnskólum Fjarðabyggðar felist aðallega í teymisvinnu, ráðgjöf, sérkennslu og stuðningi með sjónarhorn mannréttinda að leiðarljósi. Þroskaþjálfar eru taldir mikilvæg fagstétt í skólum Fjarðabyggðar í ljósi sérþekkingar þeirra á réttindum fatlaðs fólks sem og stefnum og straumum í málefnum þess. Fram kemur að helsta hindrun Fjarðabyggðar við að uppfylla kröfur sem skóli án aðgreiningar setur er skortur á fagfólki