Hvert er listrænt frelsi hönnunar?

Í þessari ritgerð mun ég leggja áherslu á að skoða mörkin á milli skapandi greina, þó aðallega hönnunar og lista, og þá skörun sem getur verið þar á milli. Línan á milli sviðanna getur verið óljós og svo virðist vera að fólk sé ósammála um hvort sviðin eigi eitthvað sameiginlegt og hvort að einstaklingur megi flakka þar á milli eða vinna beggja vegna. Umdeilt virðist vera hvort hönnun sé listgrein og standi þar jöfn öðrum skapandi greinum. Í ritgerðinni mun ég rannsaka hugarheim ólíkra einstaklinga sem vinna að verkum sínum á þann hátt að skörun verður við önnur svið eða leika sér á jaðrinum. Í nútíma samfélagi er rík tilhneiging til að flokka allt, við erum sífellt að setja allt í box. Þetta á líka við þegar kemur að skapandi greinum. Þetta er umhugsunarvert og spurning hvort það er kostur eða galli. Getur verið að þessi nálgun sé að vinna gegn okkur á einhvern máta? Augljóst er að skapandi greinar almennt eiga margt sameiginlegt og hefur það ávallt verið svo enda þótt ýmislegt hafi breyst í tímans rás. Segja má að iðnbyltingin hafi verið vendipunktur. Breytingarnar á þeim tíma höfðu mikil áhrif á þróun þess, að til varð bil milli hönnunar og listgreina