Arftakastjórnun og kynjahalli í stjórnunarstöðum: Ísland, best í heimi! Fyrir alla nema þær konur sem vilja verða forstjórar?

Ritgerð þessari er ætlað að dýpka skilning á vegferð og upplifun kvenna sem klifið hafa metorðastiga atvinnulífsins og sitja nú í æðstu stjórnunarstöðu. Arftakastjórnun spilar þar lykilhlutverk en ferlið lýsir hvernig skipað er í æðstu stöður og er þar með áhrifaþáttur í fjölgun kvenna í æðstu stjórnunarstöðum. Rannsóknarspurningar verkefninsins eru þrjár: Hefur kyn áhrif á vegferð og upplifun kvenna upp metorðastiga atvinnulífsins? Hvernig getur arftakastjórnun tryggt fleiri konum stöðu sem æðstu stjórnendur í atvinnulífinu? og Hvernig geta tengslanet stuðlað að fjölgun kvenstjórnenda? Eigindleg rannsókn var framkvæmd með viðtölum við átta konur sem allar gegna æðstu stjórnunarstöðu í íslensku atvinnulífi. Helstu niðurstöður sýndu fram á að vegferð kvenna upp metorðastiga atvinnulífsins er að mati viðmælenda hlykkjóttari en karlkyns jafningja þeirra, en hindranir þar á vegi geta verið ólíkar og misjafnt er hvort viðmælendur hafi reynt slíkt á eigin skinni eða orðið vitni að. Upplifun viðmælenda er almennt jákvæð en eru þær meðvitaðar um þann raunveruleika sem konur í atvinnulífinu þurfa að takast á við og nefna að fjölbreytni á vinnustað sé töfra uppskriftin. Skipun kvenna í æðstu stjórnendastöðu telja viðmælendur að sé háð ákveðnum þáttum svo sem menningu og vinnuumhverfi á hærri þrepum fyrirtækjastigans, karllægum atvinnugreinum, tækifærum til starfsþróunar, barneignum og ekki síst eigin viðhorfi. Þó virðast hlutirnir mjakast í rétta átt með hverju ári en í dag eru ákvæði sem styrkja stöðu kvenna á atvinnumarkaði svo sem bætt jafnréttislöggjöf og lög um foreldra- og fæðingarorlof , fleiri kvenfyrirmyndir og leiðbeinendur, aukin þátttaka kvenna í stjórnum fyrirtækja og aukin áhersla á myndun og notkun tengslaneta. Viðmælendur leiða umræðuna í gegnum vegferð sína og miðla sinni reynslu en líta þó allar björtum augum til framtíðar og hlakka til að fylgjast með yngri kynslóð kvenna streyma inn í fyrirtæki og taka sér stöðu sem æðstu stjórnendur. Lykillinn sé stuðningur og hvatning kvenna á milli ásamt dassi af þolinmæði, góðir hlutir gerast hægt