Mannauðsstjórnun: Hver er staða starfsmannamála hjá litlum og meðalstórum ríkisstofnunum?

Hlutverk millistjórnenda er margþætt og hefur starf þeirra þróast í gegnum árin. Millistjórnendur eru staðsettir á milli yfirstjórnar og rekstrarkjarna fyrirtækis, sem eru starfsmenn. Vegna nálægðar millistjórnenda við rekstrarkjarnann hafa mannauðsmál verið sett sem eitt af hlutverkum þeirra, þ.e. að bera ábyrgð á mannauðstengdum málum innan skipulagsheildarinnar ef það er ekki nein ein mannauðsdeild til staðar. Á þetta þá við um lítil og meðalstór fyrirtæki, hvort sem það sé á almennum vinnumarkaði eða hjá hinu opinbera. Mannauðsstjórnun í litlum og meðalstórum fyrirtækjum er frábrugðin mannauðsstjórnun hjá stærri fyrirtækjum og er mun óformlegri. Markmið rannsóknarinnar var að kanna hvort þessi aukna ábyrgð á millistjórnendur valdi því að mannauðsmál sitji á hakanum og hafi áhrif á önnur hlutverk þeirra í starfi. Notast var við eigindlegu aðferðafræðina einstaklingsviðtöl og voru viðmælendur millistjórnendur í litlum og meðalstórum ríkisstofnunum, sem ekki hafa sérstakan mannauðssérfræðing. Viðmælendur voru fjórir úr tveimur mismunandi stofnunum og fór rannsakandi til þeirra, þar sem viðtölin voru tekin inn í fundarherbergjum. Leitast var eftir að skoða reynslu viðmælenda á mannauðsstjórnun og athuga hvort þeir nái að sinna þeim mannauðsmálum sem koma upp. Helstu niðurstöður sýndu að viðmælendur voru heilt yfir sammála því að þessi aukna ábyrgð á mannauðnum væri ekki of mikið auka álag og væri ekki að hafa áhrif á önnur störf þeirra innan stofnunanna. Þeim fannst þessi aukna ábyrgð auðvitað erfið en þrátt fyrir það fannst þeim engin þörf að ráða inn mannauðsstjóra. Einnig kom í ljós að þar sem ekki er mikil sérþekking á mannauðsstjórnun hjá viðmælendum, gátu stofnanirnar leitað til mannauðsráðgjafafyrirtækja ef um erfið mál var um að ræða