Markaðsmisnotkun á skipulegum verðbréfamarkaði : tæknilegar breytingar á dreifingu upplýsinga og aukið aðgengi almennings að skráðum fjármálagerningum

Margt hefur verið skrifað um markaðsmisnotkun á Íslandi og jafnvel meira en góðu hófi gegnir. Það breytir því ekki að löggjöfin er í stöðugri þróun þó sú þróun sé oft nokkrum árum á eftir framkvæmdinni. Aðgangur almennra fjárfesta að verðbréfamörkuðum hefur tekið verulegum breytingum frá bankahruninu haustið 2008 en flest fordæmi íslensks réttar er varða markaðsmisnotkun eiga við háttsemi sem átti sér stað í aðdraganda þess. Allir stóru íslensku viðskiptabankarnir veita í dag aðgang að aðalmarkaði íslensku kauphallarinnar í gegnum netbanka. Samskipti almennings hafa einnig breyst töluvert á síðastliðnum áratug þar sem stór hluti samfélagsins notast í dag við samfélagsmiðla daglega. Samfélagsmiðlar gera það að verkum að hægt er að dreifa upplýsingum víða á skömmum tíma með mikilli skilvirkni. Miðlarnir, ásamt auknu aðgengi almennings að fjármálamörkuðum hafa gert ákveðnar tegundir markaðsmisnotkunar auðveldari í framkvæmd og mögulega valdið því að algjörlega ný tegund hafi rutt sér til rúms. Vegna framangreindrar þróunar verður litið til íslenskrar dómaframkvæmdar í tengslum við markaðsmisnotkun og annarra þjóða í Evrópu þar sem sama regluverk gildir en til viðbótar verður einnig litið til atvika í Bandaríkjunum. Þrátt fyrir að fordæmi bandarísks réttar gildi seint sem fordæmi hér í landi getur verklag þar gefið mynd af þróun rökstuðnings í málaferli markaðsmisnotkunarmála, þar sem tæknileg þróun fjármálamarkaða hefur þar í landi verið í fararbroddi. Rannsóknarspurning ritgerðarinnar er eftirfarandi: Ætti háttsemi sem er nýlega búin að eiga sér stað á mörkuðum með notkun samfélagsmiðla að falla undir markaðsmisnotkun