Áhrif vímuefnaröskunar einstaklings á maka og parasamband

Vímuefnaröskun er fjölskyldusjúkdómur í þeim skilningi að vímuefnaröskun einstaklings hefur áhrif á allt umhverfi hans og þá sérstaklega nána aðstandendur. Þessi ritgerð er fræðileg samantekt þar sem vímuefnaröskun og áhrif hennar eru skoðuð. Markmiðið er að varpa ljósi á hvaða áhrif vímuefnaröskun einstaklings getur haft á parasamband og á maka viðkomandi – andlega, líkamlega og félagslega. Til að komast að niðurstöðu voru skoðaðar rannsóknir, bækur og fræðigreinar um málefnið. Fjallað verður um skilgreiningar á mismunandi vímuefnum og vímuefnaröskun ásamt helstu greiningarlíkönum fyrir fagaðila til þess að greina vímuefnaröskun. Jafnframt verður fjallað um fjölskyldukerfiskenninguna, fjölskylduformgerðarlíkanið og fjölskyldusjúkdómslíkanið, ásamt umfjöllun um hugtakið meðvirkni. Enn fremur verður skoðað hvaða áhrif vímuefnaröskun einstaklings hefur á maka hans. Þá er fjallað um aðkomu félagsráðgjafa að fjölskyldu þar sem einstaklingur glímir við vímuefnaröskun. Jafnframt er farið yfir hvaða úrræði standa mökum til boða. Niðurstöður leiddu í ljós að vímuefnaröskun einstaklings getur haft alvarleg og víðtæk áhrif á maka viðkomandi. Áhrifin koma meðal annars fram sem þunglyndi, kvíði, einangrun og fjárhagslegur skaði. Í þeim samböndum þar sem vímuefnaröskun er fyrir hendi er einnig líklegra að líkamlegt ofbeldi sé til staðar. Þess vegna er mikilvægt að fagaðilar séu meðvitaðir um áhrifin sem vímuefnaröskun einstaklings getur haft á maka og hvaða úrræði standa mökum til boða