Eðli og umfang mansals innan landamæra: Vinna félagsráðgjafa með þolendum þess

Mansal er alvarlegur glæpur sem felur í sér verslun á fólki. Lengi vel hefur því verið haldið fram að mansal feli aðeins í sér fólksflutning milli ríkja. Hins vegar á það sér einnig stað innan landamæra. Hafa rannsóknirnar um innanlandsmansal verið í mun minni mæli í samanburði við mansal á milli ríkja. Markmiðið með þessari ritgerð er að varpa ljósi á eðli og umfang mansals innan landamæra sem og að beina sjónum að þeim nálgunum sem félagsráðgjafar koma til með að nota við það að bera kennsl á þolendur innanlandsmansals og veita þeim þjónustu. Menningarheimar hafa áhrif á birtingarmyndir innanlandsmansals en í hinum vestræna heimi er kynlífsmansal á börnum mest áberandi. Aftur á móti ber að hafa í huga að ekki eru margar rannsóknir að finna um mansal innan landamæra. Því er erfitt að vita nákvæmt eðli og umfang þess. Félagsráðgjafar starfa með viðkvæmum hópum í samfélaginu. Koma þeir til með að mæta þolendum mansals í starfi sínu í meiri mæli en aðrar starfsstéttir og veita þeim þjónustu. Er því mikilvægt að þeir búi yfir þeirri þekkingu og kunnáttu sem getur hjálpað þeim við að bera kennsl á þá. Vegna eðli starfsins eru félagsráðgjafar með færustu starfsstéttunum til að bera kennsl á og veita þolendum mansals stuðning. Það þarf að veita félagsráðgjöfum viðeigandi fræðslu um hvernig á að bera kennsl á þolendur innanlandsmansals svo hægt sé að veita þeim viðeigandi þjónustu. Er fræðsla og þekking hins vegar af skornum skammti þegar kemur að þolendum innanlandsmansals sem gerir það að verkum að erfitt er að bera kennsl á þá. Bitnar þessi vankunnátta á þolendum innanlandsmansals og þjónustu við þá. Það þarf því að framkvæma frekari rannsóknir sem snúa aðeins að innanlandsmansali til að bæta þá stöðu