Ofbeldi í nánum samböndum: Með áherslu á andlegt ofbeldi

Markmið ritgerðarinnar er að komast að því hverjar birtingarmyndir, áhættuþættir og afleiðingar ofbeldis í nánum samböndum eru. Einblínt er á gagnkynhneigð ofbeldissambönd og er sjónum sérstaklega beint að kvenkyns þolendum sem hafa verið beittir ofbeldi af hálfu karlkyns fyrrverandi og/eða núverandi maka. Höfundi fannst mikilvægt að varpa ljósi á alvarleika andlegs ofbeldis þar sem slíkt ofbeldi er oftar en ekki ósýnilegt eða dulbúið, meðal annars vegna þess að áverkar andlegs ofbeldis eru yfirleitt ekki jafnt greinanlegir og, til að mynda, áverkar líkamlegs ofbeldis. Helstu niðurstöður ritgerðarinnar voru þær að birtingarmyndir ofbeldis í nánum samböndum geta verið ýmislegar, meðal annars með því að skaða maka líkamlega, athöfn sem gerð er gegn vilja maka, niðurlæging maka, einangrun maka og margt fleira. Hægt var að sjá að áhættuþættir þolenda ofbeldis voru ófáir, til dæmis ungur aldur, kynþáttur og félags- og efnahagsleg staða. Hvað varðar áhættuþætti gerenda ofbeldis var ljóst að kynslóðatilfærsla ofbeldis og áföll í æsku geta leitt til ofbeldishegðunar á fullorðinsárum. Einnig voru afleiðingar ofbeldis bæði margar og alvarlegar, til dæmis áfallastreituröskun, sjálfsvígshugleiðingar, sjálfsvígstilraunir og áfengis- og vímuefnavandi. Höfundur komst jafnframt að því að félagsráðgjafar gegna mikilvægu hlutverki í starfi með þolendum ofbeldis