Lánakjör háð sjálfbærni: Sjálfbærnitengd lán sem fjármögnunarkostur fyrirtækja

Viðfangsefni ritgerðarinnar eru sjálfbærnitengd lán. Hugmyndafræðin á bakvið þau er að tengja fjárhagslegan hvata lánþega við fyrirframákveðin markmið hans í sjálfbærni. Viðhorf samfélagins til sjálfbærni á síðastliðnum árum hefur breyst töluvert og kröfur alþjóðasamfélagsins um samstiga aðgerðir hefur ýtt við fyrirtækjum. Sjálfbærar lausnir eru sífellt að verða sýnilegri og hefur fjármálahlið fyrirtækja einnig tekið við sér. Sjálfbærnitengd lán er ein þeirra lausna, en með þeim er fyrirtækjum gefin kostur á að tengja árangur sinn í umhverfisþáttum, félagslegum þáttum og eða stjórnarháttum (UFS) við lánaskilmála. Þannig geta fyrirtæki stutt við sjálfbært viðskiptamódel í gegnum fjárhagslegar ákvarðanir og átt möguleika á hagstæðari kjörum ef vel gengur. Markmiðasetning skiptir meginmáli þegar kemur að sjálfbærnitengdum lánum, velja á frammistöðumarkmið sem tengjast kjarnastarfsemi lánþega, krefjandi að ná en þó ekki ómögulegt. Lánsfjárhæðin sjálf þarf ekki að vera bundin í sjálfbærum verkefnum, ólíkt grænum lánum þar sem fjármagn þarf að nota í fyrirhuguð græn verkefni, heldur byggist á heildarárangri lánþega í fyrirframákveðnum sjálfbærnimarkmiðum. Vegna þessa er skýrslugjöf mikilvægur þáttur í sjálfbærnitengdum lánum þar sem reglulega er uppfærð staða fyrirtækja í UFS-markmiðum þeirra ásamt mati óháðs þriðja aðila en gagnsæi er mikils metin í sjálfbærnitengdri fjármögnun. Helsti ávinningur fyrirtækja við að velja sjálfbærnitengd lán sem fjármögnunarkost er að geta stutt við sjálfbært viðskiptamódel og sjálfbæra stefnu fyrirtækisins, sem getur laðað að viðskiptavini, hæft starfsfólk, aukið viðskiptavild, vörumerkjaímynd og samkeppnisforskot en síðast en ekki síst aukið aðgengi þeirra að fjármagni á hugsanlega betri lánskjörum. Þá geta sjálfbærnitengd lán einnig aðstoðað fyrirtæki að taka sín fyrstu skref í átt að sjálfbærri rekstri