Framtíðarfyrirkomulag á greiðsluþátttöku ríkisins í sjúkraþjálfun: Rannsókn á viðhorfi sjúkraþjálfara á einkavæðingu þjónustunnar sem þeir veita

Sjúkraþjálfun er mikilvæg heilbrigðisstarfsemi sem hjálpar til við að hámarka lífsgæði fólks í formi meðferðar, þjálfunar, forvarnar og endurhæfingar. Aukin eftirspurn og aðsókn hefur verið eftir þjónustu sjúkraþjálfara á síðustu árum. Það hefur meðal annars leitt til lengri biðlista í þjónustuna og útgjöld hins opinbera vegna greiðsluþátttöku í þjónustunni aukist samhliða. Síðastliðinn tvö ár hafa sjúkraþjálfarar starfað utan samnings við Sjúkratryggingar Íslands þar sem ekki hafa náðst samningar milli aðila. Í gildi er reglugerð frá heilbrigðisráðherra sem tryggir sjúkratryggðum einstaklingum niðurgreiðslu þjónustunnar. Meginviðfangsefni þessarar rannsóknar er að kanna hvert viðhorf sjúkraþjálfara er til þess að hætt verði niðurgreiðslum hins opinbera til framtíðar, þ.e. einkavæðingar þjónustunnar. Rannsóknin byggist á spurningakönnun sem send var út á félagsmenn í Félagi íslenskra sjúkraþjálfara. Alls svaraði 151 sjúkraþjálfari könnuninni. Spurningarnar voru hannaðar með það að markmiði að kanna viðhorf sjúkraþjálfara gagnvart einkavæðingu almennt og finna út hvaða þættir það væru sem skiptu þar mestu máli. Helstu niðurstöður sýndu að almennt eru sjúkraþjálfarar andvígir því að starfa án greiðsluþátttöku Sjúkratrygginga Íslands. Þá hafði starfsánægja og afkoma sjúkraþjálfara marktæk áhrif á það hversu hlynntir sjúkraþjálfarar eru gagnvart einkavæðingu þjónustunnar. Einnig eru þeir sjúkraþjálfarar sem telja einkavæðingu leysa biðlistavanda sjúkraþjálfunar hlynntari einkavæðingu. Umræðukafli rannsóknarinnar byggist á samanburði á niðurstöðum við fyrri rannsóknir og einnig eru taldir upp annmarkar rannsóknarinnar sem og dæmi um tillögur að frekari rannsóknum