KUALITAS BUKU TÉKS PANGANTEUR BASA SUNDA DUMASAR KANA KURIKULUM TINGKAT DAERAH MUATAN LOKAL 2013 REVISI 2017 (Tilikan Évaluatif kana Buku Téks Basa Sunda Kelas Luhur Tingkat Sakola Dasar)

Buku téks téh gedé pangaruhna dina prosés pangajaran. Ku sabab kitu, matéri anu dipidangkeun dina buku téks kudu luyu jeung kurikulumna. Lian ti éta, buku téks basa Sunda nu dikaluarkeun ku pamaréntah di tingkat dasar kaitung saeutik jumlahna. Antukna mangaruhan kana saeutikna panalungtikan buku téks. Miang tina éta hal, panalungtikan ngeunaan buku téks perlu dilakukeun pikeun maluruh kualitas buku téks. Tujuan utama tina ieu panalungtikan nyaéta maluruh kelayakan eusi saperti rélevansi poko bahasan, pidangan jeung amabahan matéri sarta alat évaluasi. Ieu panalungtikan ngagunakeun métode déskriptif kalayan tilikan évaluatif sarta téhnik dokuméntasi. Ari sumber datana mangrupa buku téks Panganteur Basa Sunda Kelas IV, V dan VI SD. Hasil analisis data ngébréhkeun yén rélevansi poko bahasan jeung téma katut kompetensi dasar kelas IV kawilang rélevan (78.1%), kelas V alus pisan (84.4%) jeung kelas VI rélevan pisan (83.3%). Pidangan matéri kelas IV lengkep (78,13%), kelas V lengkep 62.5 % jeung kelas VI lengkep (70.8 %). Tingkat kajembaran ambahan eusi matéri di kelas IV jeung V geus cukup kalayan perséntase 70,8 %, sarta kelas VI cukup (72 %). Dumasar kategori perséntase BSNP, pidangan jeung ambahan eusi matéri di kelas IV, V, jeung VI kagolong kana prédikat alus. Ari tingkat kasaluyuan alat évaluasi jeung indikator di kelas IV kawilang luyu pisan (81.3 %), di kelas V geus luyu (68.8 %), sarta kelas VI luyu pisan (87.5 %). Cindekna, buku téks Panganteur Basa Sunda Kelas Luhur Tingkat Sakola Dasar miboga kualitas anu alus hususna dina aspék kelayakan eusi