Impluwensiya ng barkada sa isang dalaga sa paggawa ng desisyon ukol sa pakikipagtalik sa unang pagkakataon

Sa pag-aaral na ito, inalam ng mga mananalliksik ang impluwensiyang dulot ng barkada sa dalaga ukol sa paggawa ng desisyong makipagtalik sa unang pagkakataon. Ayon sa mga datos na nakalap, ang mga kilos, pananaw, damdamin at tingin sa sarili bago, habang at pagkatapos nilang makipagtalik ang ginamit na basehan upang malaman kung gaano kalaki ang impluwensiyang dala ng mga ka-barkada sa isang kapwa ka-miyembro. Kasama rin dito ay ang pag-alam at pagsuri ng mga pamantayan ng bawat barkada at kung paano ito naipapatupad sa bawat miyembro. Tatlong barkada na mayroong apat hanggang limang miyembro na may edad na 18-21 taong gulang na nag-aaral sa mga eskuwelahan sa Maynila na may sapat na karanasan sa pakikipagtalik bago ikasal ay ang mga napiling kalahok para sa nasabing pag-aaral. Focus group discussion at malalimang panayam ang mga ginamit na metodo ng mga mananaliksik upang lubusang maunawaan at makatiyak sa katapatan ng mga datos na nakuha. Deskriptibong layunin na mayroong kwalitatibong pamamaraan ang ginamit sa pagsusuri ng mga datos. Lumabas sa resulta ng pag-aaral na malaking bahagi ang ginagampanan ng barkada sa paggawa ng desisyon ng isang dalaga ukol sa mga bagay-bagay partikular na ang pakikipagtalik. Bukod pa dito, mayroong prosesong pinagdadaanan ang isang dalaga bago, habang at matapos ang kanyang karanasan. Sa panahong ito, dito sinisiyasat ng dalaga ang kanyang pagkatao bilang miyembro ng kanyang barkada at bilang isang indibidwald. Ayon sa kanilang kasagutan, karamihan sa mga kalahok ay nakaranas ng positibong pakiramdam matapos ang kanilang karanasan ngunit hindi maiwasan na maisip nila ang mga maaaring mangyari sa kanila tulad ng pagkamuhi ng mga magulang at ang takot na mabuntis