Ang imahen ng Tondo sa mga nobelang Ang Tundo Man May Langit Din, Canal de la Reina at Sa mga Kuko ng Liwanag

Ang pag-aaral na ito na pinamagatang Ang Imahen ng Tondo sa mga nobelang, Ang Tundo Man May Langit Din, Canal de la Reina at Sa mga Kuko ng Liwanag– ay naglalayong mataya ang mga sumusunod: (1) Ano-ano ang positibong imahen ng Tondo at ano-ano ang istruktura at kadahilanan ng kanilang pagiging positibo? (2) Ano-ano ang negatibong imahen ng Tondo at ano-ano ang istruktura at kadahilanan ng kanilang pagiging negatibo? (3) Aling imahen ang mas nangingibabaw, positibo ba o negatibo at bakit nangingibabaw ang imaheng ito? (4) Ano- ano ang retorikal at literari na halaga ng paggamit ng mga may-akda sa imahen ng Tondo sa kani-kanilang nobela? Gamit ang teorya ni Geogre Poulet na tinawag ng mananaliksik na Panunuring Kamalayan ay sinuri ang kamalayan ng mga manunulat ng nobela at kamalayan ng mananaliksik sa Tondo upang masagot ang mga tanong na inilahad sa itaas. Sa kabuuan, sa pinagsamang kamalayan ng mga manunulat ng tatlong nobela na nagmula rin sa Tondo at ng mananaliksik na nagmula rin sa lugar na ito ay inalam ang nangingibabaw na imahen ng Tondo sa tatlong nobela na masasalamin pa rin sa kasalukuyang panahon