Tónlist í starfi þroskaþjálfa

Markmið verkefnisins er að búa til leiðabók fyrir þroskaþjálfa sem svarar eftirfarandi spurningum; hvernig best sé að nota tónlist í faglegu starfi, hvort og hvernig tónlist getur bætt líf fólks, hvort og hvernig þroskaþjálfar geta komið að tónlistarstarfi, hvernig aðgengi fatlaðs fólks er að tónlistarnámi á Íslandi og hvaða hindrunum það mætir. Birt eru viðtöl við fjóra fagaðila sem sérhæfa sig í tónlistarstarfi með fötluðu fólki til að fræðast um þeirra faglegu sýn og nálgun, sem og praktískar leiðir fyrir þroskaþjálfa sem vilja notfæra sér tónlist í faglegu starfi. Í sérstökum umræðukafla er síðan fjallað um mögulegar úrbætur sem geta upprætt hindranir hjá fötluðu fólki sem vill iðka tónlist. Niðurstöður benda til þess að tónlist hefur margþætt áhrif á líf, vellíðan, samskipti og þroska fólks, að fatlað fólk fær oft ekki tækifæri til að njóta þeirra jákvæðu áhrifa vegna skorts á aðgengi og að þroskaþjálfar geta eflt og stutt fatlað fólk sem iðkar eða vill iðka tónlist með margvíslegum hætti. Það má draga þá ályktun að bæta þurfi aðgengi fatlaðs fólks að tónlistarnámi og tónlistariðkun á Íslandi, að gera þurfi tónlistarnám sveigjanlegra til að mæta ólíkum þörfum, að auka megi stuðning við fatlað fólk sem stundar tónlistarnám og að þroskaþjálfar geta gegnt lykilhlutverki í því samhengi, sérstaklega þar sem þroskaþjálfun er sú fagstétt sem hefur í áraraðir sérhæft sig í málefnum fatlaðs fólks og beitt sér fyrir auknum mannréttindum þeirra