Hreyfing dagsins og góð ráð : greinargerð með handbók um hreyfingu og heilsu framhaldsskólanemenda á starfsbrautum

Greinargerðin ásamt handbókinni er lokaverkefni okkar til BA-gráðu í þroskaþjálfafræðum við Háskóla Íslands. Í greinargerðinni koma fram þær upplýsingar sem þurftu til þess að útbúa handbókina. Rannsóknarspurningin er “hvernig er hægt að gera hreyfingu aðgengilega og skemmtilega fyrir nemendur á starfsbrautum?”. Markmiðið með handbókinni er að útbúa verkfæri fyrir nemendur starfsbrauta til þess að gera hreyfingu skemmtilega. Bókin hefur heitið “Hreyfing dagsins og góð ráð” og gengur út á að aðstoða nemendur á starfsbrautum framhaldsskóla að stunda hreyfingu bæði innan og utan skóla. Bókin inniheldur æfingar sem nemendur geta stundað heima, í skólanum, með fjölskyldu og vinum, góð ráð til þess að lifa heilbrigðum lífstíl ásamt upplýsingum sem eiga að vera hvetjandi fyrir nemendurna. Mikil vöntun er á fræðsluefni á þessu sviði fyrir framhaldsskólanema og því er mikilvægt að til séu verkfæri fyrir þá nemendur sem þurfa á hvatningu og aðstoð tengt hreyfingu og mataræði. Í greinargerðinni er farið inn á fræðilegar kenningar um fötlun, aðalnámsskrá framhaldsskóla, lög og reglugerðir, heilsueflandi framhaldsskóla, matarræði unglinga í framhaldsskólum ásamt rannsóknum um svefn og heilsu. Miðað við niðurstöður á þeim rannsóknum sem skoðaðar voru er hreyfing unglinga ekki mikil. Því er það von okkar að handbókin nýtist nemendum á starfsbrautum vel og verði þeim hvatning til að hreyfa sig á aðgengilegan hátt