Keðjuverkun íslenskrar verslunar : getum við breytt kauphegðun með markaðsátaki?

Eftir að Covid skall á tóku stjórnvöld höndum saman með fjölda samtaka og gerðu markaðsátak til að minna Íslendinga á að versla í heimalandi og velja íslenskt. Auglýsingaherferðin inniheldur lag sem bendir fólki á að „láta það ganga“. Markmið ritgerðarinnar var að kanna hvort neytendur hefðu breytt kauphegðun sinni og verslað meira við íslenskar verslanir eða keypt íslenskar vörur eftir að hafa séð auglýsingarnar.Tvær rannsóknir voru framkvæmdar, annars vegar eigindleg rannsókn í formi djúpviðtala og var þar notast við snjóboltaúrtak. Þannig fengust viðtöl við aðila frá Samtökum iðnaðarins, Samtökum verslunar og þjónustu, Samtökum atvinnulífsins og Brandenburg. Að því loknu var framkvæmd megindleg rannsókn í formi spurningakönnunar til neytenda sem aðgengileg var á Internetinu. Til að nálgast þátttakendur var notast við hentugleikaúrtak og fengust 296 svör. Helstu niðurstöður voru að breyting varð á kauphegðun hjá hluta neytenda en meirihluti neytenda velur íslenskar vörur eða verslanir fram yfir erlendar. Mikill meirihluti yngsta aldurshópsins sá lítið eða ekkert af átakinu. Það sýnir að mikilvægt er að velja rétta miðla til að ná til neytenda. Lykilorð: Kauphegðun, markaðssetning, hagkerfi