Alvöru karlmenn borða kjöt: Mæta karlmenn hindrunum, hyggist þeir taka þátt í umhverfis-aktívisma og veganisma?

Af þeim sem eru meðlimir í Facebook hópnum Vegan Ísland eru konur í miklum meirihluta, og endurspeglar það einnig þann kynjahalla sem er til staðar víðs vegar í heiminum hvað varðar grænkerafæði og þá sérstaklega vegan lífsstíl. Þessi mikli kynjahalli vakti forvitni hjá rannsakanda og var því hafist handa við að finna mögulegar skýringar á þessu. Rannsakandi velti fyrir sér hvort að karlmenn forðist að taka upp vegan lífsstíl af sökum hræðslu við að það stangist á við samfélagsleg gildi og viðmið um hina hefðbundnu og „æskilegu” karlmennsku. Kynjunum er oft og tíðum stillt upp sem andstæðupörum, en stefnur innan kynjafræðinnar benda á að það er of auðvelt að útskýra flókin félagsleg samskipti með því að segja að það sé vegna eðlislægs munar kynjanna eða líffræðilegra þátta. Það er jafnvel félagslega lært að tengja karlmennsku og styrk við kjötneyslu sem ýtir undir að karlmenn rækti þær venjur. Á hinn bóginn er hnattræn hlýnun jarðar ein stærsta áskorun sem mannkynið hefur þurft að glíma við og rannsóknir benda á að minnkun á kjötneyslu sé ein helsta lausnin til að draga úr kolefnisspori og þar með sporna gegn þessum hamförum. Að þessu sögðu er ljóst að til þess að draga úr kolefnisspori þurfi mannkynið í heild sinni að gera töluverðar breytingar á neyslumynstri og jafnvel endurskoða matarvenjur. Markmið þessarar rannsóknar er að varpa ljósi á hvers vegna það eru ekki fleiri karlmenn en raun ber vitni sem ákveða að gerast vegan eða taka upp plöntumataræði þar sem ofgnótt af kjötneyslu hefur bersýnilega alvarlegar afleiðingar fyrir jörðina en tölfræði sýnir einmitt að konur virðast vera að taka meiri ábyrgð þegar kemur að þessum málefnum. Til þess að fá betri innsýn í reynsluheim karla að þessu leytinu til voru tekin fimm viðtöl við karlmenn sem höfðu ákveðið að gerast vegan og hins vegar viðtöl við fimm karlmenn sem voru ekki vegan. Niðurstöður gáfu til kynna að vegan karlmenn virðast upplifa samfélagslegar hindranir í ferlinu í átt að veganisma. Vegan viðmælendurnir tengdu þessar hindranirnar við svokallaðar ráðandi karlmennsku hugmyndir. Upplifun „ei-vegan” (e. non-vegan) viðmælenda gefur þó til kynna að viðhorfið gagnvart vegan karlmönnum er að breytast til hins betra, enda hefur töluverð vitundarvakning átt sér stað í íslensku samfélagi hvað varðar veganisma