Arðgreiðslur og endurkaup fasteignafélaga í Kauphöll Íslands

Meginmarkmið þessarar rannsóknar er að komast að því hvernig íslensk fasteignafélög standa að úthlutun verðmæta til hluthafa. Rannsókninni er skipt niður í tvo hluta. Fyrri hlutinn er rannsókn á fyrirliggjandi gögnum. Þar er úthlutun fasteignafélaga á verðmætum annars vegar borinn saman við markaðinn í heild en hins vegar fasteignafélög annars staðar á Norðurlöndunum. Samanburðurinn í þessum hluta er gerður frá sjónarhóli almenns fjárfestis og eru greiðslur því reiknaðar út sem hlutfall af hlutabréfaverði. Í seinni hluta rannsóknarinnar er greint frá niðurstöðum viðtala við stjórnarmenn innan íslenskra fasteignafélaga til að reyna að fá betri innsýn í það hvernig úthlutun verðmæta til hluthafa fer fram. Niðurstöður rannsóknarinnar leiða í ljós að fasteignafélög eru almennt undir meðaltali þegar kemur að heildarúthlutun verðmæta til hluthafa í samanburði við önnur félög sem skráð eru í Kauphöll Íslands. Íslensku félögin eru hins vegar yfir meðallagi þegar kemur að heildarúthlutun í samanburði við slík félög annars staðar á Norðurlöndunum. Einnig eru íslensku félögin langatkvæðamest hvað varðar úthlutun verðmæta í formi endurkaupa en það var annars aðeins í Noregi sem fasteignafélög fóru í endurkaup á því tímaskeiði sem rannsóknin stóð yfir. Íslensku fasteignafélögin miða útgreiðslu sína við hlutfall af rekstrarhagnaði en ekkert er tilgreint um það í arðgreiðslustefnu þeirra hvernig skiptingu arðgreiðslna og endurkaupa skuli vera háttað. Sú ákvörðun er tekin af stjórnarmeðlimum félaganna miðað við aðstæður hverju sinni