Greining á gagnadrifnum og hugarstýrðum ferlum í verkefni byggðu á spilinu SET

Kenningin um ýfingaráhrif snýst um þá hugmynd að skynjun verður fyrir áhrifum þess sem nýlega hefur verið veitt athygli á þann hátt að úrvinnsla þessarar skynjunar er hraðari. Athyglisviðbúnaður á við um þá tilhneigingu að veita þeim sjónrænum þáttum athygli sem mest varða yfirstandandi verkefni. Þegar sömu skynþættir og viðbrögð halda sínu mikilvægi á milli umferða í sjónleitartilraun þá getur athyglisviðbúnaður myndast. Í þessari tilraun verður litið til þess hvort athyglisviðbúnaður ýfist á milli umferða. Tilraunin var byggð á kortaspilinu SET. Í hverri umferð birtast þrjú spil með myndum samsettum úr fjórum víddum: litur, form, fylling og fjöldi. Spili er gefið eitt gildi af þremur úr hverri vídd. Sett myndast þegar spilin hafa sameiginlegt gildi á vídd og/eða þegar spilin hafa spönn gilda á vídd. Sett eru í flokkum 1 – 4 eftir því hversu margar víddir hafa gildi á spönn. Tilgátur tilraunarinnar voru (1) Svartímar í umferðum þar sem sett er í flokki 1 eru hraðari en í umferðum þegar sett er í flokki 4 vegna þess að úrvinnsla einfaldra áreita fer fljótar fram en úrvinnsla flókinna áreita. (2) Þegar tvær umferðir með setti í flokki 1 birtast í röð þá er svartími seinni umferðarinnar styttri vegna tilkomu ýfingar. (3) Þegar tvær umferðir með setti í flokki 4 birtast í röð þá er svartími seinni umferðarinnar styttri vegna tilkomu ýfingar. (4) Meðalsvartímar munu lækka eftir því sem þátttakendur svara oftar. Tilgátur 1, 2 og 4 stóðust en ekki tilgáta 3. Niðurstöður benda til að athyglisviðbúnaðurinn fyrir sett í flokki 1 ýfist á milli umferða