Nýting á rækjuskel hjá Dögun : samanburður mismunandi vinnsluleiða

Verkefnið er lokað til 01.04.2025.Í verkefninu er fjallað um þrjár mismunandi vinnsluleiðir. Vinnsluleið A er sigtun og pressun á rækjuskel sem safnað er eftir pillun í rækjuvinnslunni Dögun. Hráefnið er fangað í stórum rennum sem eru undir pillunarvélunum. Næst er skelinni dælt upp í gám sem stendur utan við húsnæði Dögunar og í er tromlusigti, stigaband og skrúfupressa sem skelin fer í gegnum áður en hún fellur í safngám, sem fluttur er til kaupanda hráefnisins á Siglufirði, Primex. Vinnsluleið B er þurrkun á rækjuskel sem hefur verið safnað saman eftir pillun í rækjuvinnslu Kampa á Ísafirði. Skelinni er safnað saman fyrir þurrkun. Eftir þurrkun er afurðin sigtuð í tvær mismunandi afurðir. Vinnsluleið C er þurrkun og mölun á rækjuskel sem til fellur við rækjuvinnslu. Skelinni er safnað saman eftir pillun, henni dælt í sigtun og pressun sem kemur í staðinn fyrir forþurrkun á hráefninu. Því næst fer skelin í gegnum mjölvinnslukerfi sem hannað og smíðað er af Héðni Smiðju. Afurðin er fínt og verðmætt rækjuduft.Niðurstöður verkefnisins sýna að við óbreytt ástand er núverandi fyrirkomulag, vinnsluleið A hentugasta vinnsluleið hliðarafurða hjá Dögun. Hins vegar eru mikilvægar breytur sem þarf að taka til athugunar og geta haft veruleg áhrif á niðurstöðu verkefnisins.Dögun ehf. stóð straum af kostnaði við rannsóknir á hráefni og efnagreiningu þess