Vinnutengd viðhorf og ætlun til uppsagnar

Markmið þessarar rannsóknar var að skoða vinnutengd viðhorf í tengslum við ætlun til uppsagnar. Stuðst var við kenninguna um skipulagða hegðun sem fræðilegan kenningarramma rannsóknar en hún fjallar um samband viðhorfs og hegðunar. Samkvæmt kenningunni hafa viðhorf, huglægt mat á venjum og skynjuð stjórn hegðunar áhrif á ætlun einstaklings. Í eftirfarandi rannsókn var kastljósinu þó beint að viðhorfum í tengslum við ætlun. Stuðst var við ABC viðhorfslíkanið við mælingar á viðhorfum. Líkanið skiptir viðhorfum í þrjá undirþætti en það eru tilfinningaþáttur, hugrænn þáttur og atferlisþáttur. Í þessari rannsókn var einblínt á starfsánægju, hollustu og vinnutíma sem vinnutengd viðhorf. Starfsánægja fellur undir tilfinningaþáttinn, hollusta í starfi fellur undir hugræna þáttinn og vinnutími fellur undir atferlisþáttinn. Leitað var svara hvort tengsl séu á milli vinnutengdra viðhorf við ætlun til uppsagnar. Unnið var úr gögnum frá Alþjóðlegu viðhorfskönnuninni árið 2015. Alls svöruðu 1126 Íslendingar viðhorfskönnuninni en í eftirfarandi rannsókn var einungis tekið mið af þeim sem voru í launuðu starfi en þeir voru alls 869 þátttakendur. Niðurstöður sýndu marktæk neikvæð tengsl milli starfsánægju og ætlun til uppsagnar og benda niðurstöður til þess að tilfinningaþáttur í ABC viðhorfslíkaninu hafi mestu tengslin við ætlun. Ekki fundust marktæk tengsl milli hollustu í starfi og ætlun til uppsagnar ásamt vinnutíma og ætlun til uppsagnar. Niðurstöður rannsóknar voru í samræmi við fyrri rannsóknir á starfsánægju og ætlun til uppsagnar en þó ekki í samræmi við fyrri rannsóknir á hollustu í starfi og vinnutíma við ætlun til uppsagnar