Íslensk útgáfa Bergen kaupfíknikvarðans og sálfélagslegar skýringar á kaupfíkn

Í neyslusamfélagi nútímans er hlutum haldið að fólki með markaðssetningu sem einblínir á sálrænan ávinning neysluvarnings. Það gæti verið ástæða þess að tíðni kaupfíknar hefur farið vaxandi síðustu ár. Tilgangur þessarar rannsóknar var að (a) kanna próffræðilega eiginleika BSAS kaupfíknikvarðans, sem og umfang kaupfíknar í stúdentaþýði og (b) kanna tengsl kaupfíknar við sálfélagslega skýringarþætti. Spurningalisti var sendur með tölvupósti og svöruðu 802 háskólanemar listanum. Niðurstöður sýndu að BSAS kaupfíknikvarðinn hefur góða próffræðilega eiginleika og gæti hentað vel til skimunar á kaupfíkn hér á landi. Um 27% svarenda greinast með kaupfíkn, ef marka má þau greiningarviðmið sem höfundar BSAS leggja til, flest konur. Aðhvarfsgreiningarlíkan leiddi í ljós að sjálfsmisræmi og efnishyggnir kauphvatar veittu góða forspá um kaupfíkn og að samvirkniáhrif væru þeirra á milli. Því sterkari hvata sem fólk hafði til að kaupa sér vöru til að bæta eigin líðan eða sjálfsmynd, því betur spáði sjálfsmisræmi fyrir um kaupfíkn. Niðurstöður benda til þess að væntur sálrænn ábati í kjölfar kaupa er besta forspáin um kaupfíkn og því er mikilvægt að sálfræðingar hafi sálfélagslega þætti í huga þegar kaupfíkn er meðhöndluð