Tengjast efnisþættir ritunar og efnisþættir í lesskilningi?

Að kunna að lesa og skrifa er ein forsenda þess að vera virkur þegn í nútíma samfélagi. Ritun er mikilvægt tjáningarform og þróast snemma hjá börnum. Að vera með góðan lesskilning er mikilvægt svo lesandinn skilji og meðtaki það sem lesið er. Samræmd könnunarpróf eru stöðluð stöðupróf með það markmið að veita nemendum, forsjáraðilum og kennurum stöðu nemenda í námi. Í þessu BS- verkefni var gerð tölfræðigreining á niðurstöðum grunnskólanema sem þreyttu samræmd könnunarpróf í tíunda bekk árið 2010, til að sjá hvaða þættir málfræðinnar höfðu áhrif á ritunarþátt. Við úrvinnslu gagna var notast við staðfestandi þáttagreiningu á líkaninu sem innihélt sex þætti. Þættirnir voru efni og málfar bæði í íslensku og ensku, þar að auki uppbyggingu texta á íslensku, og orðaforða á ensku. Niðurstöður tölfræðigreiningar voru að undirþættir ritunar sýndu of háa fylgni sín á milli. Þegar fylgni á þáttum rennur svona saman, er ómögulegt að skilja þá í sundur, sem benti til þess að einn almennur þáttur, frekar en margir ólíkir þættir útskýri líkanið betur. Efnisorð: Ritun, lesskilningur, efnisþáttur, þáttagreining, samræmd könnunarpróf