Afleiðingar atvinnuleysis í kjölfar Covid-19: Aðgerðir stjórnvalda við félagslegum og fjárhagslegum vanda

Heimsfaraldur Covid-19 hófst í byrjun árs 2020 og er óhætt að segja að hann hafi skollið á með miklum látum. Faraldurinn dreifðist hratt út og á stuttum tíma náði hann mikilli útbreiðslu um allan heim. Markmið þessarar ritgerðar er að skoða hvernig Covid-19 hefur haft áhrif á atvinnulíf hér á landi ásamt því að skoða hvernig stjórnvöld hafa brugðist við til að koma til móts við fyrirtæki og einstaklinga. Rannsóknarspurningarnar eru tvær og er ein undirspurning: Hvernig hefur Covid-19 haft áhrif á atvinnuleysi á Íslandi? Hvað hafa stjórnvöld gert til þess að bregðast við auknu atvinnuleysi hér á landi? Undirspurning: Eru aðgerðir stjórnvalda að miða meira að félagslegum eða fjárhagslegum stuðning? Fyrst er fjallað um fræðilegt efni svo sem skilgreiningar og kenningar. Því næst er skoðað hvernig atvinnuleysi hefur þróast hér á landi með tilkomu Covid-19 ásamt því að skoða aðrar afleiðingar sem faraldurinn hefur haft í för með sér. Gerð er grein fyrir heilsufarslegum og efnahagslegum áhrifum atvinnuleysis ásamt afleiðingum þess á fjölskyldulíf. Því næst er farið í markmið félagsráðgjafa, tengsl þeirra við samfélagsleg áföll og vinnu þeirra með atvinnulausum. Að lokum er allt dregið saman í umræðu. Það hefur sýnt sig í rannsóknum að umfang atvinnuleysis er mikið og hefur það í nánast öllum tilfellum neikvæðar afleiðingar. Mikil aukning á atvinnuleysi hefur orðið í kjölfar faraldursins og við því hafa stjórnvöld þurft að bregðast með ýmsum aðgerðum. Stjórnvöld brugðust við með margvíslegum hætti og buðu upp á aðgerðir til að aðstoða fyrirtæki og einstaklinga á erfiðustu tímum faraldursins. Aðgerðir stjórnvalda hafa þó aðallega snúið að efnahagslegum þáttum en ekki þeim félagslegu. Mikil aukning hefur verið á langtímaatvinnuleysi í kjölfar faraldursins og er það áhyggjuefni þar sem rannsóknir sýna fram á alvarleika þess