Straumlínustjórnun í kvikmyndaframleiðslu. Hentar hugmyndafræði straumlínustjórnunar í framleiðslu á kvikmyndum og sjónvarpsefni á Íslandi

Markmið rannsóknarinnar var að skoða umhverfi stjórnenda í framleiðslu á kvikmyndum og sjónvarpsefni og bera saman við aðferðir og hugmyndafræði straumlínustjórnunar. Það sem vakti áhuga höfundar á þessu efni var að sjálfur hefur hann starfað í kvikmyndaframleiðslu og í öðrum sambærilegum umhverfum þar sem ekki hefur verið hefð fyrir sérstaklega stöðluðuð vinnubrögðum. Sú ákvörðun að bera þessa stjórnunarhætti saman við straumlínustjórnun kom í kjölfar skoðunar á aðferðum til þess að auka skilvirkni. Talið er að skilvirkni og straumlínustjórnun hafi lengi haldist í hendur og á það allt rætur sínar að rekja til þeirrar hugmyndafræði sem varð að veruleika í verksmiðjum Toyota á tímum seinni heimstyrjaldarinnar. Rannsóknarspurning sem lagt var upp með að svara var: Hentar hugmyndafræði straumlínustjórnunar í framleiðslu á kvikmyndum og sjónvarpsefni á Íslandi? Niðurstöður rannsóknarinnar leiddu það í ljós að núverandi stjórnunarhættir stjórnenda í framleiðslu á kvikmyndum og sjónvarpsefni samsvaraði nokkrum af helstu gildum straumlínustjórnunar. Þar af leiðandi var það ályktun höfundar að túlka mætti niðurstöður sem svo að hluti hugmyndafræðinnar myndi henta og geta stuðlað að ávinningi við framleiðslu á kvikmyndum og sjónvarpsefni. Ef stjórnendur myndu sækja sér nauðsynlegrar þekkingar á fræðum straumlínustjórnar og innleiða hluta hugmyndafræðinnar í þeirra stjórnunarhætti, væri hægt að sjá fram á breytingar í stjórnun. Til þess að stuðla að þessum breytingum þyrftu stjórnendur að miðla boðskap hugmyndafræðinnar um útrýmingu á sóun og stöðugum umbótum til starfsmanna og þannig stefnt að því að skapa sameiginlegan skilning innan skipulagsheildarinnar. Engin ein leið er hins vegar talin best þegar kemur að innleiðingu og notkun þessara aðferða. Það er síðan hlutverk lesanda þessarar rannsóknar að velta steinum og komast að sinni eigin niðurstöðu út frá gögnum sem fram koma í þessari ritgerð. Hér á eftir er fjallað um sögu og þróun straumlínustjórnunar auk þess sem saga kvikmyndagerðar á Íslandi er reifuð og stjórnunarhættir í framleiðslu á kvikmyndum og sjónvarpsefni skoðaðir