Stuðningsúrræði fyrir fjölskyldur vegna áfengis- og vímuefnaröskunar foreldra

Í þessari ritgerð er varpað ljósi á þau stuðningsúrræði sem standa til boða fyrir fjölskyldur þar sem einn eða fleiri fjölskyldumeðlimir glíma við áfengis- og vímuefnaröskun og hvernig megi mögulega bæta þjónustu við þessar fjölskyldur. Rannsóknarspurningarnar eru: Hvaða áherslur, nálgun og hugmyndafræði er stuðst við til að veita stuðning við einstaklinga sem glíma við vímuefnaröskun og fjölskyldur þeirra? Og hvaða úrræðum er beitt af barnaverndaryfirvöldum vegna tilkynninga um óviðunandi uppeldisaðstæður barns sökum vímuefnaröskunar foreldris og hvaða þjónusta stendur þeim til boða? Niðurstöður ritgerðarinnar benda til þess að árangursríkast sé að horfa á fjölskylduna sem heild og fjölskylduumhverfi þess sem glímir við vímuefnaröskun fremur en eingöngu einn einstakling innan hennar til að ná sem bestum árangri. Almenningur spilar stórt hlutverk í að tryggja að börn búi við viðunandi aðstæður með því að tilkynna um mál til barnaverndar. Mikilvægt er að barnavernd leiti leiða til að finna lausn á málum með tilliti til fjölskyldunnar sem heildar, þar sem hagsmunir barnsins eru í forgangi. Þá benda niðurstöður ritgerðarinnar til þess að bjóða þurfi upp á fjölbreyttari meðferðarúrræði hér á landi, bæði með því að bjóða upp á lengri meðferðarsamfellu og nálgun sem beinist meira að fjölskyldunni sem heild fremur en einstaklingum