Skráning og miðlun þekkingar innan Heilsugæslu höfuðborgarsvæðisins á tímum kórónuveirufaraldurs

Þekking er mikilvæg og dýrmæt eign sem hægt er að nýta til þess að viðhalda eða auka samkeppnishæfni skipulagsheilda og stofnana. Tilgangur þess að skrá og miðla þekkingu innan skipulagsheilda er að nýta betur þá þekkingu sem er til staðar. Þekkingarmiðlun hefur lítið verið rannsökuð innan opinberra stofnana en þar ríkir oft stigveldi og mikið skrifræði ásamt því að þær eru oft undir pólitískum áhrifum sem getur haft takmarkandi áhrif á miðlun þekkingar. Rannsóknir hafa sýnt að notkun þekkingarstjórnunar getur haft mikil áhrif og bætt verkferla hjá opinberum stofnunum ásamt því að vera öflugt verkfæri til þess að auka skilvirkni á mörgum sviðum. Markmið með þessari rannsókn er að skoða hvernig þekking er skráð og miðlað innan Heilsugæslu höfuðborgarsvæðisins. Einnig er ætlunin að skoða hvort að Covid-19 hafi haft áhrif á og breytt verkferlum innan stofnunarinnar á einhvern hátt. Eigindleg aðferðafræði var notuð við framkvæmd rannsóknarinnar. Tekin voru fjögur viðtöl við almenna starfsmenn Heilusgæslu höfuðborgarsvæðisins sem allir unnu á ólíkum starfssviðum. Helstu niðurstöður sýndu að starfsmenn innan Heilsugæslu höfuðborgarsvæðisins eru að vinna að skráningu og miðlun þekkingar að einhverju leyti en ekki er til nein markviss stefna um það. Það skortir hvatningu frá stjórnendum til þess að miðla og skrá þekkingu en ástæðan fyrir því gæti verið sú að Heilsugæsla höfuðborgarsvæðisins starfar að mörgu leyti eftir leiðbeiningum frá Embætti landlæknis, heilbrigðisráðuneytinu og fleiri stöðum þaðan sem kemur mikil þekking og faglegar leiðbeiningar. Það getur haft hamlandi áhrif á frumkvæði og sjálfstæði stjórnenda og starfsmanna í starfi. Helstu hindranir fyrir skráningu á þekkingu eru tímaskortur og svigrúm. Áhrif Covid-19 á verkferla Heilsugæslu höfuðborgarsvæðisins var einna helst tengt tæknilegum búnaði vegna breytinga á fundarhaldi og samkomutakmörkunum. Aðrar breytingar sem hafa komið í kjölfar Covid-19 innan Heilsugæslunnar voru aukin samskipti og samvinna. Þar að auki jókst hraði í ákvarðanatöku, meðal annars á breytingum sem höfðu setið á hakanum í langan tíma