Hvernig má draga úr vanlíðan barna vegna forsjárdeilu foreldra? Afleiðingar forsjárdeilna á börn og úrræði þeim til stuðnings

Sýnt hefur verið fram á neikvæð áhrif skilnaða og ágreinings foreldra á börn en fáar rannsóknir taka forsjárdeilur fyrir. Forsjárdeilur birtast oft sem keppni milli foreldra þar sem þarfir barna gleymast í hita leiksins. Í þessari ritgerð verður leitast við að svara spurningunum: Upplifa börn vanlíðan þegar foreldrar þeirra eiga í forsjárdeilum? og Hvernig er hægt að koma í veg fyrir að börn upplifi vanlíðan í kjölfar skilnaðar foreldra sinna? Forsjárdeilur geta haft margvísleg áhrif á börn en það gera skilnaðir líka. Forsjárdeilur geta haft í för með sér hlutverkarugling, aðlögunarvanda, óstöðugleika, rugling, misvísandi upplýsingar og ógn um höfnun eða missi. Langvarandi ágreiningur getur líka valdið áfallastreitu hjá börnum og sállíkamlegum einkennum. Til að draga úr vanlíðan barna þurfa foreldrar að geta bætt foreldrasamráð og lagt áherslu á þarfir barnanna. Þá skipta úrlausnaraðferðir miklu máli til að foreldrar nái sáttum og dragi þar með úr þeim áhrifum sem forsjárdeilur hafa á börn. Mikilvægt er að börnin fái að taka þátt með því að leggja fram sínar skoðanir málsins og að tekið sé tillit til skoðana þeirra