Skólafélagsráðgjöf. Seigla unglinga með áhættuhegðun

Skólafélagsráðgjafar vinna innan skólakerfisins og eru vel búnir til þess að aðstoða nemendur í skólum. Þessi ritgerð fjallar um unglinga með áhættuhegðun, aðstæður þeirra og tækifæri til þess að byggja upp seiglu með aðstoð skólafélagsráðgjafa. Skólakerfið gegnir mikilvægu uppeldishlutverki í lífi barna og er kjörinn vettvangur til þess að grípa inn í hegðunarvanda á borð við áhættuhegðun um leið og hún birtist. Skólafélagsráðgjafar sinna meðal annars ráðgjöf til nemenda og foreldra ásamt því að meta og greina þætti sem geta haft áhrif á námsárangur og líðan nemenda. Umhverfi barna á þátt í því að byggja upp seiglu þeirra og getur veitt þeim réttu verkfærin til þess að auka hana ef rétt er brugðist við aðstæðum. Skólafélagsráðgjafar vinna innan skólanna og eru vel í stakk búnir til þess að aðstoða nemendur. Seigla einstaklinga samanstendur af innri styrkleikum og ytri verndandi þáttum í lífi einstaklinga. Hvernig unglingnum vegnar svo þegar hann kemst á fullorðinsár ræðst af því hvort verndandi þættir í lífi hans voru fleiri en áhættuþættir og öfugt. Í ritgerðinni er fjallað um hlutverk skólafélagsráðgjafa og hvernig aðkoma þeirra getur aðstoðað unglinga sem sýna áhættuhegðun að byggja upp seiglu. Seigla eykur getu þeirra til að leysa úr vandamálum sínum. Ef allir þættir í lífi nemenda eru skoðaðir heildrænt fæst betri yfirsýn yfir hvað hentar hverjum og einum í námi. Auðveldara væri þá að aðlaga þá að skólakerfinu þrátt fyrir að áhættuþættir séu til staðar. Jafnvel hefur verið talið að jákvæð upplifun af skólastarfi sé mikilvægari en námsárangur þegar kemur að þróun frávikshegðunar. Leitast er við að svara eftirfarandi rannsóknarspurningu: Hvernig getur skólafélagsráðgjöf aukið seiglu unglinga sem hafa sýnt áhættuhegðun? Helstu niðurstöður leiddu í ljós að skólafélagsráðgjöf getur verið mikilvægur hlekkur í skólastarfinu. Starfsfólk skólakerfisins kallar á aðstoð frekara fagfólks þegar kemur að hegðunar- og félagslegum vanda nemenda. Unglingar sem sýna áhættuhegðun eru þar á meðal. Skólafélagsráðgjafar gætu þar stigið inn í og leiðbeint nemendum sem og öðrum sem að þeirra máli koma hvernig megi auka seiglu þeirra. Ráðgjöf sem skólafélagsráðgjafar veita nemendum sínum, foreldrum og samstarfsfólki er mikilvæg til þess að byggja upp seiglu unglinga sem sýna áhættuhegðun og hefur verndandi áhrif á líf þeirra