Skólafélagsráðgjöf: Týndur hlekkur í íslensku skólakerfi

Börn og unglingar verja miklum tíma af sínu lífi í skóla. Grunnskóli er því stofnun sem gegnir mikilvægu hlutverki í þeirra lífi og hefur áhrif á þroska þeirra, getu og færni. Nemendahópar í skólum eru mjög ólíkir og þarfir þeirra mismunandi eftir því. Sumir nemendur búa við erfiðar félagslegar aðstæður, námserfiðleika, streitu innan fjölskyldu eða erfiðleika við að aðlagast nýrri menningu. Því er mikilvægt að skólar búi yfir hagnýtum úrræðum til þess að veita þessum nemendum viðeigandi stuðning. Auk þess þurfa skólar að stuðla að jákvæðri upplifun þeirra í skóla, góðri námsframvindu og bættri líðan til þess að koma í veg fyrir þróun frekari vandamála í framtíðinni. Hugmyndafræðileg nálgun skólafélagsráðgjafa byggir á heildarsýn og kerfishugsun sem gerir þeim kleift að horfa á þroska barna sem samspil margra þátta. Því geta skólafélagsráðgjafar verið mjög mikilvægir þeim nemendum sem þurfa aukinn stuðning. Meginmarkmið ritgerðarinnar var að svara eftirfarandi rannsóknarspurningum: Hver eru helstu hlutverk skólafélagsráðgjafa og hvernig geta þeir stutt við skólastarf? Niðurstöður ritgerðarinnar sýna að hlutverk skólafélagsráðgjafa eru mörg og mismunandi. Skólafélagsráðgjafar eru fyrst og fremst talsmenn nemenda en þeir sinna einnig ýmiss konar ráðgjöf, vinna að þróun úrræða og forvarna ásamt því að starfa í þverfaglegum teymum bæði innan skólans og velferðarstofnanir utan hans. Einnig gegna þeir mikilvægu hlutverki sem brú á milli heimila og skóla og bæta þannig samskipti og draga úr álagi á kennara. Auk þess sýna niðurstöður að aðkoma skólafélagsráðgjafa getur komið að góðum notum í vinnu með börn af erlendu bergi brotin þar sem þeir búa yfir góðri menningarhæfni. Út frá niðurstöðum má draga þá ályktun að mikilvægt sé að innan allra grunnskóla starfi félagsráðgjafar til þess að styðja við nemendur og starfsfólk skólans